विराटनगर : कोशी प्रदेशका मुख्यमन्त्री हिक्मतकुमार कार्कीले आज बुधवार महाशिवरात्रि पर्वका अवसरमा शुभकामना सन्देशमा धार्मिक पर्यटनको माध्यमबाट प्रदेशको आर्थिक समृद्धि हासिल गर्न सकिने बताएका छन् ।
शुभकामना सन्देशमा उनले नेपाल सदैव आध्यात्मिक चिन्तनको केन्द्र रहेको उल्लेख गर्दै भगवान् शिवको महिमा र नेपालको धार्मिक तथा सांस्कृतिक महत्वलाई उजागर गर्दै धार्मिक पर्यटन प्रवर्द्धन गर्दै आर्थिक समृद्धि हासिल गर्न सकिने बताएका हुन ।
मुख्यमन्त्रीले सन्देशमा भनेका छन् ‘नेपालको पवित्र पाशुपत क्षेत्र तथा अन्य धार्मिक स्थलहरूको उचित संरक्षण र प्रवर्द्धन गर्दै धार्मिक पर्यटनको विकास गर्न कोशी प्रदेश सरकार प्रतिबद्ध छ ।’
कोशी प्रदेश सरकारले २०८२ साललाई पर्यटन वर्षका रूपमा मनाउने घोषणा गरिसकेको उल्लेख गर्दै मुख्यमन्त्रीले सन्देशमा यस अभियानलाई सफल बनाउन सबैको सहकार्य आवश्यक रहेकोमा जोड दिएका छन् ।
उनले महाशिवरात्रि पर्वले धार्मिक सहिष्णुता र सामाजिक एकताको सन्देश दिने बताएका छन् । सन्देशमा भनेका छन् ‘यस पर्वले नेपाली समाजलाई थप मेलमिलाप, सहकार्य र भाइचाराको भावना विकास गर्न प्रेरित गर्नेछ ।’
महाशिवरात्रि सँगै मनाइने सैनिक दिवसको अवसरमा पनि शुभकामना व्यक्त गर्दै मुख्यमन्त्री कार्कीले नेपाली सेना तथा सुरक्षाकर्मीहरूको योगदानको उच्च प्रशंसा गरेका छन् ।