समाजसेवी भीम कटुवालको पहलमा एकल महिला र बालबालिकाहरूको शैक्षिक भविष्यका लागि सहयोगी कार्यक्रम

वराहक्षेत्र : आर्थिक अवस्था कमजोर भएका एकल महिलाहरूलाई सहयोग तथा उनीहरूका बालबालिकालाई विद्यालय जान सहयोग पुर्‍याउने उद्देश्यले आयोजना भएको (सिबिआई) कार्यक्रम वराहक्षेत्र नगरपालिकाको वडा नं ३ देखि ११ सम्म लागू भएको छ ।

विपन्न एकल महिला र बालबालिकाहरूको शैक्षिक भविष्य तथा दैनिक जीवनस्तरमा सेवा पुर्‍याउने उद्देश्यले वराहक्षेत्र नगरपालिकाका वडा नं ३, ४,५, ६, ७, ८, ९, १० र ११ वडामा उक्त कार्यक्रम लागू भएको हो ।

नेपाली काङ्ग्रेसका महाधिवेशन प्रतिनिधि वराहक्षेत्र नगरपालिका वडा नं ८ निवासी भीम कटुवालको पहल र सक्रियताबाट 'द राइजिङ नेपाल'ले उक्त कार्यक्रम ल्याएको हो ।

उक्त कार्यक्रममा सूचीकृत भएका विपन्न गरिब एकल महिलालाई १० डलर तथा उहाँहरूको १८ वर्ष भन्दा कम उमेरका २ जना बच्चाहरूलाई ५/५ डलर साप्ताहिक रूपमा शैक्षिक तथा दैनिक जीवन सहज रूपमा जीवन यापन गराउन सहयोग स्वरूप पाउने छन् । हाल वराहक्षेत्रमा ५ सय विपन्न एकल महिलाले कार्ड प्राप्त गरेको कार्यक्रमको पहलकर्ता भीम कटुवालले बताए ।

बिहीबार उक्त कार्यक्रमबाट लाभान्वित हुने एकल महिलाहरूसँग कार्यक्रमको बारे जानकारी तथा छलफल समेत भएको छ । वडा नं ९, १० र ११ को कार्यालयमा भएको कार्यक्रममा वराहक्षेत्र नगरपालिकाका नगर प्रमुख रमेश कार्की, वडा नं ९ का अध्यक्ष निरञ्जन चन्द्रवंशी, वडा नं १० का अध्यक्ष  तेजबहादुर गरुङ्ग, वडा नं ११ का अध्यक्ष कृष्ण कुमार महतो लगायत स्थानीय समाजसेवी सहभागितामा कार्यक्रमको सहयोगी संस्था 'द राइजिङ नेपाल'का अधिकारी, पहल गर्नु हुने भीम कटुवालको सहभागिता रहेको थियो ।

आर्थिक अवस्था कमजोर भएका एकल महिलाहरूलाई सहयोग तथा उनीहरूका बालबालिकालाई विद्यालय जान सहयोग पुर्‍याउने उद्देश्यले आयोजना भएको (सिबिआई) कार्यक्रमबाट विशेष गरी १८ वर्ष भन्दा कम उमेरका बालबालिकालाई सहज रूपमा विद्यालय जाने वातावरण बनाउन उक्त कार्यक्रमको उद्देश्य रहेको भीम कटुवालले बताए ।