वराहक्षेत्र : वराहक्षेत्र नगरपालिका वडा नं १ खारखोला स्थित कसेनी टोल र राई टोललाई सफा र स्वच्छ क्षेत्र घोषणा गरिएको छ । वडा नं १ को कार्यालयले नगरपालिकाको सहयोगमा दुई वटा टोललाई सफा र स्वच्छ क्षेत्र घोषणा गरेको हो ।

आइतबार दुई वटै टोललाई संयुक्त कार्यक्रम आयोजना गरी सधैँ सफा राख्ने प्रतिबद्धता गराउँदै प्रमुख अतिथि वराहक्षेत्र नगरपालिकाका प्रमुख रमेश कार्कीले सफा र स्वच्छ क्षेत्र घोषणा गरेका हुन् ।

कार्यक्रममा वडा नं १ का वडा सदस्य दिपक राईले स्वागत भाषण गर्दै व्यक्तिले आफ्नो शरीर, घर र टोललाई सधैँ सफा र स्वच्छ राख्नुपर्नेमा जोड दिएका थिए । कार्यक्रममा राई टोलमा विजय कुमार राई र कसेनी टोलमा लालमाया राईले गाउँलाई सफा राख्ने प्रतिबद्धता समेत व्यक्त गरेका थिए ।

पटक-पटकको अनुगमनबाट टोललाई सफा र स्वच्छ क्षेत्र घोषणा गरिएको र स्थानीयको जागरूकताको नगर प्रमुख कार्कीले प्रशंसा गरेका थिए । उनले आफ्नो घर, टोल र गाउँलाई सफा राख्न आव्हान समेत गरे ।

वडा नं १ का वडा अध्यक्ष किसन थापामगरको सभाध्यक्षतामा सम्पन्न कार्यक्रम सञ्चालन वडा सचिव लक्ष्मण पौडेलले गरेका थिए ।