वराहक्षेत्रमा माझी समुदायले कोसीमा १९औँ लदि पूजा मनाए

वराहक्षेत्र : मङ्गलवार माझी समुदायले १९ औँ कोशी अर्थात् लदि पूजा मनाएका छन् । माझी जातिहरूले लदि पूजाको रूपमा कोशीमा गएर हरेक वर्षको फागुन महिनाको तेस्रो मङ्गलवार मनाउने गर्दछन् ।

सोमवार राति घर-घरमा दीपावली मनाएका माझी जातिहरूले मङ्गलवार कोशी नदीको किनारमा जमघट भएर पूजा, आराधना र बलि दिएर इष्ट देवताको रूपमा कोशी पूजा मनाएका हुन् । वराहक्षेत्र नगरपालिका स्थित सिसौलीतार घाट सप्तकोशीमा आयोजना भएको पूजा नेपाल माझी उथान सङ्घ सुनसरीले आयोजना गरेको थियो ।

आदिवासी जनजातिको रूपमा सूचीकृत माझी जातिहरूले लदि पूजाको रूपमा कोशीमा आएर हरेक वर्षको फागुन महिनाको तेस्रो मङ्गलवार मनाउने गरेका छन् । कोशीको अलवा नदी, ताल, तलाउमा पनि पूजा गरी आफ्नो पुर्ख्यौली पेसा नाउँ चलाउँदा र माछा मार्दा कुनै भवितव्य नहोस् भनेर भाकल गरी मनाउने पञ्चवली भैँसी, सुँगुर, हास, कुखुरा र खसी दिइने प्रचलन रहेको नेपाल माझी उथान सङ्घ सुनसरी अध्यक्ष घनश्याम माझीले जानकारी दिए ।

वराहक्षेत्र-२ स्थित सिसौली घाटमा नेपाल माझी उथान सुनसरीले आयोजना गरेको १९औँ कोशी पूजामा सुनसरी आसपासबाट सयौँ माझी परिवारहरूको उपथिति रहेको थियो । माझी उथान सुनसरी अध्यक्ष घनश्याम माझीको अध्यक्षतामा सम्पन्न औपचारिक कार्यक्रमको प्रमुख अतिथि कोशी प्रदेश सरकारका पर्यटन, वन तथा वातावरण मन्त्री सदानन्द मण्डलले माझीहरूले माछा मार्दा प्रयोग गर्ने जाल हानेर उद्घाटन रहेका थिए ।

कार्यक्रममा नगर प्रमुख रमेश कार्की विशिष्ट अतिथि रहेका थिए । कार्यक्रममा वडा अध्यक्षहरू, माझी उथान सङ्घका केन्द्रीय पदाधिकारीहरू, राजनैतिक दलका प्रतिनिधिहरू, विभिन्न जातीय सङ्घ, संस्थाका प्रतिनिधिहरू, सुरक्षा निकायका प्रतिनिधिहरूको आतिथ्यता रहेको थियो ।

कोशी पूजा फागुनको तेस्रो सोमवार दीपावली पूजा, मङ्गलवार लदि पूजा र बुधवार मझेस्वा गरी तिन दिन मनाइने प्रचलन गरेको छ ।  सप्तकोशी महारानीलाई सम्झेर सुनसरी, मोरङ, उदयपुर लगाएका क्षेत्रबाट माझी जातिहरू पूजा गर्न आउने गरेका छन् । उक्त माझी पूजाको अवसरमा वराहक्षेत्र नगरपालिकाले सार्वजनिक बिदा समेत दिएको थियो ।