इटहरी : कोशी प्रदेशका मुख्यमन्त्री हिक्मतकुमार कार्कीले मानिसहरू बसाई सरेर गाउँबाट शहर तिर झरिरहेको बेला लागुऔषध दुर्व्यसनको लत भने सहरबाट गाउँतिर लागेको बताएका छन् ।
प्रदेश सरकारको सहयोगमा प्रदेश प्रहरी कार्यालयद्वारा सुरु गरिएको ‘अबको युद्ध दुर्व्यसन विरुद्ध’ नामक अभियान उद्घाटन कार्यक्रममा मुख्यमन्त्रीले उक्त कुरा बताएका हुन ।
उनले प्रदेश सरकारको साझेदारी र सहकार्यमा दुर्व्यसनविरुद्धको अभियान सञ्चालन गरिएको बताउँदै यस्ता अभियान सरकार एक्लैले मात्रै गरेर सफल नहुने बताउँदै अभिभावक, शिक्षक, सामाजिक अभियन्ता, जनप्रतिनिधिहरूलाई सहकार्यको आव्हान गरे ।
मुख्यमन्त्री कार्कीले भने ‘प्रदेश सरकार कानुनी र आर्थिक प्रबन्धमा अभियानको काम अगाडि बढाउन लागि परेको छ ।’ कोशी प्रदेशमा दुर्व्यसनको अवस्था भयावह हुन थालेपछि अभियान सुरु गरिएको उनले बताए ।
कोशी प्रदेश सरकारले दुर्व्यसन नियन्त्रणलाई प्राथमिकता राखी अभियानलाई अगाडि बढाउन प्रदेश प्रहरी कार्यालयसँग सहकार्य गरेको मुख्यमन्त्रीको भनाई छ ।
कोशी प्रदेश प्रहरी कार्यालयका प्रहरी नायब महानिरीक्षक राजन अधिकारीले अभियानको अवधारणा प्रस्तुत गरे । यसअघि झाँकी सहितको र्‍यालीले इटहरी बजार परिक्रमा गरेको थियो ।