धरान : प्रहरीले धनकुटा शहिदभूमी गापा-४ का ३१ वर्षीय शिव राईलाई शनिवार विराटनगरमा लागुऔषध ब्राउनसुगर सहित पक्राउ गरेको छ ।

कोशी प्रदेश प्रहरी कार्यालय विराटनगरले जनाए अनुसार लागुऔषध नियन्त्रण व्यूरो विराटनगरको प्रहरी टोलीले चेक जाँचको क्रममा राईको साथबाट २ ग्राम ७१ मिलिग्राम ब्राउनसुगर बरामद गरेको छ ।

यसैगरी बिर्तामोड-४ का अभिषेख साहलाई १ ग्राम ब्राउनसुगर सहित प्रहरीले पक्राउ गरेको छ । इलाका प्रहरी कार्यालय कुमरखोद झापाको प्रहरी टोलीले पक्राउ गरेको उनको बारेमा थप अनुसन्धान भइरहेको छ ।

पथरीशनिश्चर-२ का २५ वर्षीय दीपक तामाङ, २६ वर्षीय मनिस तामाङ, २० वर्षीय रोहन निरौला, २६ वर्षीय मानब लिम्बूलाई इलाका प्रहरी कार्यालय पथरीले प्रतिबन्धित लागुऔषध सहित पक्राउ गरेको छ ।

प्रहरी अनुसार उनीहरूको साथबाट ट्रमाडोल १८० क्याप्सुल, स्पासमिड ३७० ट्यावलेट र नगद ४९ हजार ५ सय रुपैयाँ बरामद भएको छ ।