विराटनगर : भएका संरचना भत्किएको विपत्तीका बेला मानवीय उद्धार तथा खोजी कार्य सम्बन्धी कोशी प्रदेशका प्रहरीहरूलाई ७ दिने तालिम प्रदान गरिएको छ ।

कोशी प्रदेश प्रहरी कार्यालय विराटनगरद्वारा आयोजित तालिममा प्रदेशका विभिन्न जिल्लाका प्रहरी कार्यालयहरूबाट ३० सहभागी थिए ।

प्रदेश प्रहरी कार्यालयमा सोमवार भएको तालिम समापनमामा प्रमुख अतिथि प्रदेश प्रहरी कार्यालयका निमित्त कार्यालय प्रमुख भीमबहादुर दाहालले विपत्तिका बेला प्रहरीले आफूसँग भएका सीमित स्रोत साधन स्थानीय औजारहरू प्रयोग गरी खोज तथा उद्धार कार्यमा जुट्न प्रशिक्षार्थीहरूलाई निर्देशन दिए ।

उद्धार र खोज कार्यको मुख्य उद्देश्य मानवीय उद्धार तथा भौतिक क्षति न्यूनीकरणप्रति लक्षित रहनुपर्ने उनले बताए ।

तालिम संयोजक प्रहरी नायव उपरीक्षक डम्बरबहादुर पुरीले तालिम सम्बन्धी प्रतिवेदन प्रस्तुत गरेका थिए । प्रहरी उपरीक्षक दीपक पोखरेल सहित प्रहरी अधिकृतहरू समापनमा उपस्थित थिए ।

Police-training