धरान : मध्यरातमा निर्माणाधीन कल्भर्टमा ठोक्किएर दुर्घटना हुँदा उर्लाबारीका मनिस लिम्बूको मृत्यु भएको छ ।

राती करिब साढे १२ बजे पूर्वबाट पश्चिमतर्फ स्कुटरमा सवारी भई जाने क्रममा महेन्द्र राजमार्गअन्तर्गत उर्लाबारी-३ नयाँ मङ्गलवारे स्थित निर्माणाधीन कल्भर्टमा ठोक्किएर दुर्घटना हुँदा उर्लाबारी-८ का २८ वर्षीय लिम्बूको मृत्यु भएको इलाका प्रहरी कार्यालय उर्लाबारीले जनाएको छ ।

प्रहरीका अनुसार निर्माणाधीन कल्भर्ट छेउमा रहेको डाईभर्सन थाहा नहुँदा उनी सिधै कल्भर्टमा ठोक्किएका थिए । दुर्घटनाबाट घाइते भएका लिम्बूलाई तत्काल मदन भण्डारी अस्पताल तथा ट्रमा सेन्टर लगिएको थियो ।

प्रहरीका अनुसार उनको चिउँडो र छातीमा चोटपटक देखिएको थियो । उनको ट्रमा सेन्टरमा उपचार सम्भव नभएपछि विराटनगरस्थित नोवेल अस्पताल रिफर गरिएको उर्लाबारी प्रहरीले जनाएको छ ।

नोवेलमा उपचारकै क्रममा उनको बुधवार बिहान करिब ६ बजे मृत्यु भएको प्रहरीले जनाएको छ । पछिल्लो समय एशियन हाईवे बन्ने क्रममा असुरक्षित रूपमा छाडिएको निर्माण स्थलकै कारण दुर्घटना बढ्दै गएको छ ।

निर्माण स्थलमा उच्च सतर्कता नअपनाउँदा र डाईभर्सनबारे चालकलाई जानकारी नहुँदा सवारी दुर्घटनामा परि अकालमै धेरैले ज्यान गुमाउनुपरेको छ । यसबारे निर्माण व्यवसायी र सरोकारवालाले गम्भीर भई सोच्न आवश्यक देखिन्छ।