मरिमराऊ भएका दमक-८ का घर-घरमा सीसी क्यामेरा जडान, अवाञ्छित क्रियाकलापको निगरानी हुने

झापा : दमक नगरपालिका ८ न. वडा कार्यालय दमकले वडा भित्र बसोबास गर्ने वडावासीका परिवार भित्रका सदस्यहरूको मृत्युपछि काजकिरियामा बसेका वेला निरन्तर भइरहेको चोरीको घटना नियन्त्रण गर्न ३ वटा घरमा सीसी क्यामेरा जडान गरी सकेको छ ।

दमक नगरपालिकाको ८न.वडा कार्यालयले वडा भित्रका विभिन्न टोलमा मरिमराऊ भएका टोल वासी परिवारहरूको घर-घरहरूमा सीसी क्यामेरा जडान गरेको हो ।

झापाको दमक ८न.वडाको शुभलक्ष्मी टोल विकास संस्थाकी सदस्य ९७ वर्षीया पवित्रा पराजुलीको निधन भएपछि गत फागुन २५ गते, बसन्त टोल विकास संस्थाको सदस्य७६ वर्षीय थिरनाथ दाहालको निधन भएपछि फागुन २७गते र सरस्वती मार्ग टोल विकास संस्थाका सदस्य ७५वर्षीय कुल बहादुर लिङ्देनको निधन भएपछि चैत २ गते उनीहरूको घरमा सीसी क्यामेरा जडान गरेको वडाध्यक्ष धर्म प्रसाद दाहाल (दिपेश)ले जानकारी दिनु भयो ।

घरपरिवारका सदस्यको मृत्यु भई काज किरियामा बस्दाको समय अवधिभर दमक ८को वडा कार्यालयले सीसी क्यामेरा जडान गरी ती घरको निगरानी गर्ने वडाध्यक्ष दाहालले बताउनु भयो ।

परिवारका सदस्यको मृत्यु भई काजकिरियामा बसेका बेला निरन्तर भइरहेको चोरी लगायतका घटनालाई मध्यनजर गरी मरिमराऊ भएका घरमा सीसी क्यामेरा जडान गरि निगरानी गरिने वडाध्यक्ष दाहालले भनाई छ ।

सम्बन्धी घर परिवारको काजकिरिया सकेपछि सीसीक्यामेरा खोलेर वडा कार्यालयमा लगेर राख्ने वडा अध्यक्ष दाहालले जानकारी दिनुभयो । सीसीक्यामेराको प्रक्रिया पुरा गरेर जडान गरेको दमक ८न.वडा कार्यालयले जनाएको छ ।

स्वर्गीय ९७ वर्षीया पवित्राको काजकिरिया गरिरहनु भएका उहाँको छोरा कृष्ण प्रसाद पराजुलीले मरिमराऊ भएको घरमा वडा कार्यालयले सिसी क्यामेरा जडान गरेर राम्रो काम गरेको बताउनु भयो । यसले गर्दा लफडा,झगडा गर्ने प्रवृत्ति बोकेकाहरू आउने क्रम रोकिएको कृष्णले बताउनु भयो ।

नयाँ मान्छे आएको चिन्न,यहाँ आउने हरेक मान्छेले सिसी क्यामेरा देखेपछि ओहो सिसी क्यामेरा रहेछ भन्ने एक खालको त्रासले धेरैलाई सजक गराएको पराजुलीको बुझाइ छ ।

स्वर्गीय थिरनाथको काकी पशुपति कीर्तन मण्डली दमक अध्यक्ष डोयना दाहालले मरिमराऊ भएको घरहरूमा सीसीजडानले तास खेल्न आउने अनि चोरी चकारी गर्नेलाई कम्तीमा पनि वेरा लगाएको छ । यसले चोरी लगायतका धेरै अप्रिय घटनालाई रोक्न सहयोग पुग्ने डोयनाको भनाइ रहेको छ ।

यसै गरी स्व.बाबु कुल बहादुरको काजकिरियामा बसेका उनका छोरा पर्शुराम लिङ्गदेनले पनि सिसी क्यामेरा जडानले चोरी मात्र नभई धेरै कुराको निगरानी गरेको बताएका छन् ।

शोकमा भित्र बसेर को आए को गए हेर्ने पनि सजिलो भएकोले वडा कार्यालयको यो काममा पर्शुराम धेरै खुसी हुनुहुन्छ । यो वडा सरकारले चोरी लगायतका अवाञ्चित क्रियाकलापको निगरानी गर्न सिसी क्यामेरा जडान गर्ने काम सराहनीय भएको इलाका प्रशासन कार्यालय दमकका प्रमुख झेरन्द्र प्रसाद चापागाईँले बताउनु भयो ।

सीसी टी.भी.को निगरानीबाट आपराधिक व्यक्तिहरूको मनोवैज्ञानिक असर पुर्‍याई अपराध नियन्त्रण गर्न सीसी टी.भी.जडान तथा सञ्चालन सम्बन्धी कार्यविधि ०७२को संशोधन ०७५को कार्यविधिमा उल्लेख छ ।