इटहरी : ६८औँ राष्ट्रिय सहकारी दिवसको अवसरमा सेवा बचत तथा ऋण सहकारी संस्थाका सहायक प्रबन्धक सम्मानित भएका छन् । प्रदेश सहकारी रजिष्ट्रारको कार्यालयले सेवा सहकारीका राजेश जोशीलाई सम्मान गरेको हो ।

इटहरीमा केन्द्रीय कार्यालय रहेको सेवा सहकारीले अन्य ५ वटा शाखाबाट सेवा दिइरहेको छ । पूर्वको प्रतिष्ठित सहकारीको रूपमा स्थापित सेवाले कर्मचारी र सञ्चालक समितिलाई विभिन्न क्षमता अभिवृद्धि गराउने कार्यक्रम गर्छ ।

१८ गते विराटनगरमा भएको प्रदेश सहकारी रजिस्ट्रार तथा प्रशिक्षण कार्यालयबाट सेवाका जोशी उत्कृष्ट घोषित भए । सम्मान पत्र ग्रहण गर्दै उनले सहकारीले लामो समयदेखि लिएको सकारात्मक गति र सञ्चालक समितिको सहयोगले यो उपलब्धि पाएको बताए ।

कार्यक्रममा उत्कृष्ट सहकारीकर्मीको रूपमा सद्भाव सहकारी रङ्गेलीका अध्यक्ष कमलेश ठाकुर, उत्कृष्ट व्यवस्थापक रमाइलो जनभावना सहकारीका कृष्ण कुमार अधिकारी सम्मानित भए ।

बचत विधामा राष्ट्रसेवक बचत तथा ऋण सहकारी विराटनगर, बहुउद्देश्यमा सुभ लक्ष्मी बहुउद्देश्यीय गौरादह, र साना किसान विधामा महिला साना किसान चौदण्डीगढी सहकारी सम्मानित भएका हुन् ।