धरान : प्रहरीले विराटनगर-१५ का २६ वर्षीय प्रिन्सकुमार साहलाई मारुती कारमा ३ केजी गाँजा सहित मङ्गलवार राती पक्राउ गरेको छ ।

कोशी प्रदेश प्रहरी कार्यालयले जनाए अनुसार धनकुटाको साँगुरीगढी गापा-६ भेडेटार रवी-राँके सडक खण्डमा को १ च ३४७८ नम्बरको मारुती कार चेकजाँच गर्दा प्लास्टिकको १० पोकामा उक्त परिमाणको गाँजा बरामद भएको हो ।

इलाका प्रहरी कार्यालय भेडेटारको गस्ती प्रहरी टोलीले राती ९ बजे शङ्कास्पद अवस्थामा कार रोकेर चेकजाँच गरेको थियो । पक्राउ परेका कार सहित साहलाई जिल्ला प्रहरी कार्यालय धनकुटाबाट थप अनुसन्धान भइरहेको छ ।

भेडेटार-धरान रुटबाट गाँजा तस्करीमा कडाइ भएपछि रवी-राँके सडक हुँदै इलाम, झापा तिर झारेर भारत निकासीका लागि गाँजाको धन्धा सुरु भएको यस घट्नाबाट सङ्केत पाइएको छ ।