धरान : प्रदेश सरकारको २० लाख रुपैयाँ बजेटमा धरान-५ देउरालीको लागि सुरु गरिएको छुट्टै खानेपानी परियोजनाको डिप बोरिङबाट बुधवार पानी निस्किएको छ ।

गत फागुन ९ देखी सुरु गरिएको बोरिङबाट ४१ दिनमा भूमिगत पानी निस्किएको हो । प्रति सेकेन्ड १२ लिटर पानी आएकोले बोरिङको कार्य सफल भएको देउराली खानेपानी सरसफाइ उपभोक्ता समितिका अध्यक्ष लक्ष्मी नेवाङ लिम्बुले बताए ।

उनले भने ‘पानी निस्किएकाले योजनाको २० प्रतिशत काम पुरा भएको छ ।’ बोरिङ स्थलबाट पम्प स्टेसन निर्माण गरी झोडापाटाको ट्याङ्की सम्म पुर्‍याउने ८० प्रतिशत कार्य भने बाँकी छ । अध्यक्ष लिम्बुले भने ‘प्रदेश सरकारबाट बाँकी कार्य पनि पुरा गरिदिन्छ भन्ने विश्वास छ ।’

देउरालीको ३१ सय घरधुरीका लागि पर्याप्त खानेपानी आपूर्ति गर्न छुट्टै परियोजना सुरु गरिएको हो । चारकोशे जङ्गल स्थित पानबारी सामुदायिक वन क्षेत्रमा डिप बोरिङ सफल भएपछि खानेपानीको समस्या समाधान हुने कुरामा स्थानीयवासी आशावादी भएका छन् ।

प्रदेश सरकार खानेपानी सिँचाइ डिभिजन कार्यालय इटहरीले ‘डिप बोरिङ’को ठेक्का टेन्डर विराटनगरको रेश्मा डिप बोरिङ टुवेल उद्योगलाई दिएको थियो । डिप बोरिङबाट पानी समितिको ट्याङ्कीमा जडान भएपछि खानेपानी उपभोक्ता सम्म पुग्नेछ ।

अहिले देउराली खानेपानी समितिले ४ वटा स्रोतबाट खानेपानी सङ्कलन गरी आपूर्ति गर्दै आएको छ । तर त्यसबाट खानेपानी समस्या समाधान नभएकोले प्रदेश सरकारको बजेटमा भूमिगत श्रोतको पानीको योजना सुरु गरिएको हो ।

देउरालीमा हाल शेरा, अधेरी, लामिछाने खोलाहरूबाट पानी सङ्कलन गरी ल्याउने गरिएको छ । तर त्यसबाट खानेपानी पर्याप्त आपूर्ति नहुँदा उपभोक्ताले ३ दिनमा १ पटक पानीको पालो पाउने गरेका छन् ।