धरान : राजावादी आन्दोलनकारीले चैत १५ गते औषधिजन्य उत्पादन कम्पनी समेतलाई तारो बनाएर तोडफोड, आगजनी गर्दा करिब २८ करोड रुपैयाँको क्षति पुगेको प्रारम्भिक अनुमान छ ।

काठमाडौँको कोटेश्वर-लोकन्थली स्थित जडीबुटी उत्पादन तथा प्रशोधन कम्पनी लिमिटेडमा आक्रमण गर्दा उक्त क्षति पुगेको महाप्रबन्धक सङ्गीता यादवले बताएकी छन् । कम्पनीले बहुपरिचित ब्राण्ड औषधिजन्य ‘सञ्चो’ उत्पादन गर्दै आएको छ ।

नेपाल सरकारको स्वामित्वमा सञ्चालित कम्पनी २०३७ सालमा स्थापना भएको थियो । २०५० सालबाट ‘सञ्चो’ उत्पादन सुरु गरेपछि कम्पनी विस्तार भएको हो ।

चैत १५ गते तीनकुनेबाट भागेका प्रदर्शनकारी कोटेश्वरबाट ठाउँठाउँमा आगो लगाउँदै जडीबुटी चोकमा उनीहरूले सञ्चो कारखानामा सरकारी नम्बर प्लेटका गाडीहरू देखेर आगजनी गर्न थाले ।

साथै कम्पनीको भवनमा पनि उनीहरूले जहाँबाट अनुकूल हुन्छ, त्यहीँबाट आगो लाउन थाले । आगो ५ घण्टा बढी समय दन्किरह्यो । जिल्ला प्रशासनको कर्फ्यु आदेशपछि पनि सडकमै रहेका प्रदर्शनकारीले सेना समेतलाई बाटो नदिएर दमकल रोकेकाले क्षति बढी पुगेको हो ।

उक्त दिनको मध्यरात मात्रै आगो नियन्त्रणमा गरियो । त्यति बेला सम्म भवन भग्नावशेषमा परिणत भइसकेको थियो ।