इटहरी : इटहरी उपमहानगरपालिका १३ (खनार) मा सञ्चालित अरिहन्त अटो कोरुगेसन प्रालिले अनधिकृत उत्पादन गरेको पाइएको छ ।
इटहरी उपमहानगरपालिकाको टोलीले गरेको अनुगमनमा उद्योगले एउटा सामान उत्पादन गर्ने भनेर अन्य धेरै सामानको उत्पादन गर्ने गरेको पाइएको हो । 
आइतबार गरेको अनुगमनको क्रममा उद्योगले धेरै प्रदूषण फैल्याएको र उद्योगको सञ्चालन नियम सङ्गत भएको बताइएको छ ।
क्राफ्ट पेपर उत्पादन गर्ने भनेर इजाजत लिए पनि प्लास्टिक र कागजका अन्य सामानको समेत उत्पादन भएकाले सम्पूर्ण कारोबारको व्यवसाय दर्ता प्रमाणपत्र माग गरिएको छ ।
उपमहानगरपालिकाको टोलीले व्यवसाय दर्ता/नवीकरणको प्रमाणपत्र, घरेलु दर्ता, नक्सापास, सम्पत्ति कर तिरेको रसिद लगायत विवरण ७ दिन भित्र पेसगर्न अल्टिमेटम दिएको छ । हंसराज जैनले सञ्चालन गरेको उद्योगले विषादीयुक्त धुवा फैल्याएको भन्दै स्थानीय विरोध जनाउँदै आएका छन् ।
यसअघि स्थानीयले बारम्बार आन्दोलन गरे पनि उद्योगको प्रदूषणमा कमी आएको छैन । उद्योगको कारण सो क्षेत्र आसपासमा पानी सुक्ने देखि स्थानीयलाई छाला तथा श्वासप्रश्वास सम्बन्धी रोगले सताएको छ ।