_1749430366.gif)
झापा : सिम्रिक यातायात ट्राभल्स एण्ड टुर्सले आफ्नो सेवा औपचारिक रूपमा शुभारम्भ गर्दै झापाको कनकाई गाउँपालिका सुरुङ्गामा एक विशेष समारोह आयोजना गरेको छ । कम्पनीले हालै भित्र्याएको आठ नयाँ गाडीको विधिवत् पूजाआजा गर्दै नियमित सेवा सञ्चालन गर्ने घोषणा गरेको हो ।
कार्यक्रममा जिल्ला ट्राफिक प्रहरी कार्यालय झापाका प्रमुख गणेश पौडेल प्रमुख अतिथि रहेका थिए । उनले यातायात क्षेत्रलाई व्यवस्थित, सुरक्षित र समयानुकूल बनाउन निजी क्षेत्रको योगदान महत्त्वपूर्ण रहेको बताउँदै यात्रु सुरक्षालाई उच्च प्राथमिकता दिनुपर्नेमा जोड दिए। साथै, ट्राफिक नियमको पालना गरे सडक दुर्घटना न्यून हुने भन्दै सचेत रहन आग्रह गरे।
कार्यक्रमको अध्यक्षता कम्पनीका अध्यक्ष रेवती प्रसाद पाण्डे (कुमार) ले गरे। उनले यात्रु सेवा, समयपालन र व्यवहारमैत्री सेवामा सिम्रिक प्रतिबद्ध रहेको बताउँदै कम्पनीले झापा, मोरङ र सुनसरीमा सेवा विस्तार गरेको जानकारी दिए।
कम्पनीकी प्रबन्ध निर्देशक शर्मिला अधिकारीले प्रमुख अतिथि लगायत उपस्थित पाहुनालाई मायाको चिनो प्रदान गर्दै कम्पनीप्रतिको विश्वास र सद्भावप्रति आभार प्रकट गरिन्। उनले नयाँ दृष्टिकोणसहितको यातायात सेवाबाट यात्रुलाई सहज र सुरक्षित सेवा दिने प्रतिबद्धता जनाइन्।
यसैगरी, प्रमुख कार्यकारी अधिकृत आयुस बोगटीले यात्रुहरूलाई फरक अनुभव दिने गरी सेवा सञ्चालनमा ल्याएको उल्लेख गरे। कम्पनीका इन्चार्ज जीवन थापाले सिम्रिक यातायातलाई पूर्वी नेपालमा विश्वासिलो र समयमै सेवा दिने कम्पनीका रूपमा स्थापित गर्ने लक्ष्य रहेको बताए।
समारोहमा स्थानीय, यातायात व्यवसायी, पत्रकार, सुरक्षाकर्मी तथा विभिन्न क्षेत्रका विशिष्ट व्यक्तित्वहरूको उपस्थिति रहेको थियो। गाडी पूजापछि कम्पनीले काँकडभिट्टा, गौरीगञ्ज, विराटनगर र धरानबाट यात्रु सेवाको औपचारिक शुभारम्भ गरेको जनाएको छ।
