धरान : जेनजीका १९ जना किशोरहरूको शहादत पछि प्रधानमन्त्री केपी शर्मा ओलीले दोस्रो दिन आज मङ्गलवार साँझ छ बजे सर्वदलीय बैठक आव्हान गरेका छन् ।
आन्दोलनदलहरू र शीर्ष नेताहरूतर्फ लक्षित भएपछि वार्ता/संवादको सम्भावना खोज्न सर्वदलीय बैठक बोलाएका हुन । जेनजी संवादमा आउने सम्भावना भने कम छ ।
तर सर्वदलीय बैठक भएमा प्रधानमन्त्री ओलीलाई पद छाड्ने दबाब पर्न सक्छ । हिजै आन्दोलन चर्किएको स्वरूपले प्रधानमन्त्रीले दबाब परेको थियो तर उनले वार्ता संवादको कुरा गरेका थिएनन् । दोस्रो दिन पनि आन्दोलन जारी रहेपछि ओलीमाथि सत्ता छोड्नुपर्ने दबाब अझ बढेको छ ।
विपक्षी दलहरूले प्रधानमन्त्रीको राजीनामा माग गरिरहेका बेला सत्ता गठबन्धनका साझेदार काँग्रेसका गृहमन्त्री रमेश लेखक, कृषि मन्त्री रामनाथ अधिकारीले राजीनामा दिएका छन् ।अरू मन्त्रीले पनि राजीनामा दिने तयारी गरेको काँग्रेस श्रोतले बताएको छ ।
काँग्रेसमा एमालेलाई दिएको समर्थन फिर्ता लिएर सर्वदलीय राष्ट्रिय सहमतिको सरकार बनाउने पहलको लागि दबाब बढेको छ । आज साँझ हुने सर्वदलीय बैठकमा काँग्रेसको रणनीति प्रस्तुति कस्तो हुन्छ भन्ने चासो राजनीतिक वृत्तमा बढेको छ ।
