धरान : धरान नगर अन्तर वडा महिला नकआउट फुटबल प्रतियोगिताको आज शुक्रवार भएको पहिलो र दोस्रो दुवै खेल ट्राईबेकरमा निर्णय भयो ।
पहिलो टाई ब्रेकरमा धरान ३ ले धरान १४ लाई २-० गोलले पराजित गर्‍यो । दोस्रो टाईब्रेकरमा धरान २० ले धरान ५ लाई ३-० गोलले पराजित गर्दे क्वाटर फाइनलमा प्रवेश गरेको छ ।
धरान रङ्गशालामा जारी खेलमा निर्धारित ६० मिनेटमा दुवै खेलमा कुनै पनि गोल हुन नसकेपछि खेलको निर्णय टाईब्रेकरबाट भएको हो । 
खेलको ‘फेयरप्ले अफ द म्याच धरान ३ की नम्रता लिम्बु र धरान २० की एलिसा राई घोषित भइन् । दुवैले नगद २/२ हजार सहित मेडल र प्रमाणपत्र प्राप्त गरे ।
मङ्सिर २७ गते सम्म सञ्चालन हुने प्रतियोगिताको विजेताले नगद ९० हजार र उपविजेताले ४५ हजार रुपैयाँ पाउनेछ ।
व्यक्तिगत विधातर्फ ‘फेयरप्ले अफ द म्याच’ विजेताले २ हजार, उत्कृष्ट मिड फिल्डर र किपरले ३ हजार ५ सय र उत्कृष्ट खेलाडीले ५ हजार रुपैयाँ प्राप्त गर्नेछन् । प्रतियोगिताको आयोजना जनपथ जागरण समाज, धरान १६ ले गरेको हो ।