धरान : धरानमा स्थानीय सहित सुनसरीका सहकारीकर्मीहरुलाई सीमाभन्दा माथिका कारोबार, शङ्कास्पद कारोबार नियन्त्रण र गतिविधि प्रतिवेदनबारे तालिम दिइएको छ ।
सहकारी क्षेत्रमा वित्तीय पारदर्शिता र सुशासन प्रवर्द्धन गर्ने उद्देश्यले सम्पत्ति शुद्धीकरण (एएमएल)तथा जिओएमएल प्रणाली सम्बन्धी तालिम आयोजना गरिएको हो।
धरानमा मङ्गलवार धरान नगर सहकारी समन्वय समिति र जिल्ला सहकारी सङ्घ लिमिटेड सुनसरीको आयोजनामा तालिम सम्पन्न भएको हो।
तालिममा सहकारी संस्थाहरूलाई सीमाभन्दा माथिका कारोबार प्रतिवेदन (टिटिआर), शङ्कास्पद कारोबार प्रतिवेदन (एसटिआर)तथा शङ्कास्पद गतिविधि प्रतिवेदन (एसएआर)सम्बन्धी अनुशिक्षण दिइएको छ ।
तालिम सुनसरीका १२ वटै स्थानीय तहमा एकसाथ तालिम सञ्चालन गरिएको जिल्ला सहकारी सङ्घ लिमिटेड सुनसरीका अध्यक्ष दिनेश श्रेष्ठले बताए ।
नेपाल रेडक्रस सोसाइटी सुनसरीको सभा हलमा भएको तालिममा धरानका ५५ वटा सहकारी संस्थाका ११० जना प्रतिनिधि सहभागी थिए ।
तालिममा सहकारी संस्थाका पदाधिकारी तथा कर्मचारीलाई सम्पत्ति शुद्धीकरण निवारण, प्रणालीमा दर्ता प्रक्रिया तथा टिटिआर, एसटिआर र एसएआर सम्बन्धी प्रतिवेदन तयार गर्ने र पेश गर्ने विधिबारे सहजीकरण गरिएको थियो।
प्रमुख अतिथि धरान उपमहानगरपालिकाका कार्यवाहक प्रमुख अइन्द्रविक्रम बेघाले तालिमको उद्घाटन गरेका थिए उनले सहकारी क्षेत्रलाई पारदर्शी, उत्तरदायी र कानुनसम्मत बनाउन यस्ता तालिम प्रभावकारी हुने बताए ।
उनले सहकारीका पदाधिकारी कर्मचारी सहभागीहरूलाई ध्यानाकर्षण गराउँदै भने "वित्तीय अनुशासन कायम राख्दै सहकारी संस्थाले नियामयकी व्यवस्था अनिवार्य पालना गर्नुपर्छ ।"
जिल्ला सहकारी सङ्घले सुनसरीका १२ वटै स्थानीय तहका सहकारी संस्थाका पदाधिकारी तथा कर्मचारीलाई तालिममा सहभागी हुन आग्रह गरिएको थियो।
