इटहरी : धरान उपमहानगरपालिकामा आर्थिक वर्ष २०८१/८२ मा मात्र ५ करोड ७० लाख ८१ हजार ८०१ रुपैयाँ बेरुजु थप भएको छ ।अघिल्लो वर्ष २०८०/८१० सम्मको ३९ करोड ३३ लाख ९४ हजार २०१ रुपैयाँ सहित जम्मा ४५ करोड ४ लाख ७६ हजार २ रुपैयाँ पुगेको हो ।
प्रतिवेदनले तत्कालीन नगर प्रमुख हर्क साम्पाङको कार्यकालमा उपमहानगरको वित्तीय व्यवस्थापन, सवारी सञ्चालन खर्च तथा खानेपानी आयोजनासँग सम्बन्धित आर्थिक दायित्वबारे गम्भीर प्रश्न उठाएको छ।
धरान उपमहानगरपालिकाका सवारी साधन मर्मतमा १ करोड २ लाख खर्च भएको देखिएको छ । पालिकाका ८१ थान सवारी साधनमा ५८ लाख ७८ हजार र सरसफाइका साधनको मर्मतमा ४३ लाख ८९ हजार खर्च भएको प्रतिवेदनमा उल्लेख छ । कर्मचारी र कार्यालय प्रयोजनको लागि १ करोड २० लाखको इन्धन मात्र खर्च भएको हो ।
खानेपानी बोर्डले भने धरान उपमहानगरपालिका सँगको सम्झौता कार्यान्वयन नगरेको पाइएको छ ।बोर्डले उपमहानगरपालिकालाई ६४ करोड ७७ लाख ३ हजार रुपैयाँ तर्नुपर्ने देखिएको छ ।
उपमहानगरपालिकाले खानेपानी आयोजनाको लागि हालसम्म ६६ करोड ५२ लाख ९८ हजार लगानी गरेपनि बोर्डले २०७४ जेठ १४ गतेको सम्झौता अनुसार रकम फिर्ता नदिएको हो ।
नगर विकास कोषबाट ६२ करोड १४ लाख ८४ हजार रुपैयाँ ऋण लिएको उपमहानगरपालिकाले हालसम्म १३ करोड ४२ लाख ६४ हजार साँवा र १६ करोड ९१ लाख २२ हजार व्याज भुक्तानी गरिसकेको छ ।
धरान उपमहानगरपालिकाका नगर प्रमुख बोर्डको अध्यक्ष हुने प्रावधान भएपनि सम्झौता अनुसार बोर्डबाट उपमहानगरपालिकालाई रकम उपलब्ध हुन सकेको छैन ।
कोषलाई उपमहानगरपालिकाले अझै ४८ करोड ७१ लाख १९ हजार रकम तिर्न बाँकी रहेको प्रतिवेदनमा उल्लेख छ ।
