धरान : कवि बम देवानको नयाँ कविता सङ्ग्रह ‘मनका छालहरू’शनिवार धरानमा विमोचन गरिएको छ । कवि देवान सहित सहभागी साहित्यकारुहरुले संयुक्त रूपमा पुस्तक विमोचन गरेका हुन ।
समारोहमा कविता स)ग्रहबारे डा. अस्मिता विष्ट र डा. तुलसी गौतमले परिचर्चा गरेका थिए । गौतमले देवानका कृतिहरूले उनको बहु आयामिक व्यक्तित्व, जीवनदर्शन र प्रगतिशील चेतनालाई उजागर गरेको बताए ।
गौतमले महेन्द्र क्याम्पसमा अध्ययनका क्रममा समकालीन कवि गोविन्द विकल र मञ्जुलको सङ्गतसँगै क्याम्पसका प्रगतिशील साहित्यिक गतिविधिले देवानको साहित्यिक व्यक्तित्वलाई थप परिपक्व बनाएको बताए ।
डा. अस्मिता विष्टले बम देवान धरानका एक आदरणीय, निष्ठावान् र लोकप्रिय राजनीतिक व्यक्तित्व भएको उल्लेख गरिन् । जीवनभर समाज परिवर्तन र प्रगतिशील विचारधाराको वकालत गरेका देवानको साहित्यिक यात्राले धरानको साहित्यिक परिवेशमा महत्त्वपूर्ण योगदान रहेको बताईन् ।
कृष्ण पाख्रिन स्मृति प्रतिष्ठानको आयोजनामा विमोचन कार्यक्रम भएको हो । यसअघि देवानको ‘हाम्रो गीत हाम्रो आवाज’ २०३० र ‘आगोको खेती’ २०७२ प्रकाशित भइसकेका छन्।
१७० पृष्ठको ‘मनका छालहरू’मा कवि देवानले अस्तित्व बोधी चेतना,युगीन यथार्थ, जातीय तथा सांस्कृतिक चेतना,समकालीन समाज र मानिसका अन्तर्द्वन्द्वलाई कविताको मूल विषय बनाएका छन् ।
विमोचन समारोहको सभापतित्व कृष्ण पाख्रिन स्मृति प्रतिष्ठानका अध्यक्ष, प्राध्यापक राजेश विद्रोहीले गरेका थिए ।
