धरान : कोशी प्रदेशका पर्यटकियस्थलमा घुम्न आउने आन्तरिक तथा विदेशी पर्यटकहरूको सुरक्षा तथा पर्यटकीय स्थलहरूको शान्ति सुरक्षाका लागि प्रदेश प्रहरीले ती क्षेत्रमा खटिने प्रहरीहरूलाई पर्यटक प्रहरी अनुशिक्षण तालिम प्रदान गरेको छ ।
कोशी प्रदेश प्रहरी कार्यालय विराटनगरद्वारा आयोजित ७ कार्य दिनको अनुशिक्षण मङ्गलवार प्रदेश पर्यटन वन तथा वातावरण सचिव डा. इन्द्र प्रसाद सापकोटाले समापन गरेका छन् ।
प्रमुख आतिथि सापकोटाले कोशी प्रदेशमा पर्यटकीय स्थलहरूको अवलोकन र भ्रमणको लागी आउने विदेशी तथा स्वदेशी पर्यटकको आवश्यक शान्ति सुरक्षाका विषयमा पर्यटक प्रहरीको महत्त्वपूर्ण भूमिका रहेको बताए ।
कोशी प्रदेश प्रहरी प्रमुख नायव महानिरीक्षक विनोद घिमिरेले सहभागीहरूलाई प्रदेशमा रहेका पर्यटकीय स्थलहरूको सुरक्षा व्यवस्था प्रभावकारी बनाई पर्यटकहरूको सुरक्षामा विशेष ध्यान दिन निर्देशन दिए ।
तालिम प्रहरी निरीक्षक बिगम खड्काको संयोजनमा भएको थियो । प्रदेश प्रहरी कार्यालयहरूमा कार्यरत जुनियर अधिकृत र प्रहरी जवान सहित ३० जना तालिममा सहभागी थिए।
