धरान : धरान ब्याडमिन्टन क्लबले आयोजना गरेको दोस्रो ‘धरान खुल्ला राष्ट्रिय र्याङकिङ ब्याडमिन्टन प्रतियोगिता–२०८३ को आयव्यय सार्वजनिक गरेको छ ।
क्लबले आइतवार पत्रकार सम्मेलन आयोजना गरी प्रतियोगिताको हिसाब सार्वजनिक गर्दै प्रतियोगिताबाट कुल १ लाख ५९ हजार, ९७० रुपैयाँ बचत भएको जनाएको हो । प्रतियोगितामा ,१०७ टिम सहभागी भएका थिए ।
आर्थिक तथा प्राविधिक प्रतिवेदन सार्वजनिक गर्दै प्रतियोगिताले धरानलाई राष्ट्रिय ब्याडमिन्टनको महत्त्वपूर्ण केन्द्रका रूपमा थप स्थापित गरेको क्लब अध्यक्ष टङ्क बहादुर लिम्बुले बताए ।
प्रतियोगितामा स्थानीय स्तर र खुल्ला विधाको सहभागी दर्ता शुल्क, विभिन्न सङ्घ–संस्था, पालिका तथा वडाबाट प्राप्त आर्थिक सहयोग, प्रायोजक तथा व्यापारिक प्रतिष्ठानको सहयोगबाट प्रतियोगिताले कुल १७ लाख ४० हजार ९ सय रुपैयाँ आम्दानी गरेको बताइएको छ ।
क्लबका आर्थिक संयोजक खगेन्द्रकुमार मेन्याङ्बोले प्रतियोगिता १५ लाख ८० हजार ९ सय ३० रुपैयाँ खर्च भएको बताए । प्रतियोगितामा ७ लाख ९१ हजार रुपैयाँ नगद पुरस्कार वितरण गरिएको थियो ।
प्रतियोगिता २०८३ वैशाख १८ देखि २० गतेसम्म सञ्चालन भएको थियो । प्रतियोगितामा नेपाल सहित भारतको नागाल्याण्ड र विहारबाट समेत प्रतिस्पर्धामा खेलाडी सहभागी भएको क्लबका अध्यक्ष टङ्कबहादुर लिम्बूले बताए ।
खेल संयोजक तेज मेन्याङवोले प्रतियोगिताको सफल आयोजनाले धरानलाई राष्ट्रिय ब्याडमिन्टन प्रतियोगिताको महत्त्वपूर्ण केन्द्रका रूपमा स्थापित गर्न थप ऊर्जा मिलेको बताए । उनले भने ‘आगामी संस्करणलाई अझ व्यवस्थित, प्रतिस्पर्धात्मक र अन्तर्राष्ट्रिय स्तरको बनाउने छौँ ।’
