इटहरी : सङ्घीय र प्रदेश सरकारसँग समन्वय गरी चक्रपथ निर्माणको सम्भाव्यता अध्ययन गरिने भएको छ ।
आगामी आर्थिक वर्ष २०८३/८४ को बजेट नीति तथा कार्यक्रममा इटहरीको सर्वाङ्गीण विकासलाई मध्यनजर गर्दै गुरुयोजना निर्माण गर्न लागिएको हो ।
बुधवार उपप्रमुख सङ्गीता कुमारी चौधरीले प्रस्तुत गरेको बजेटमा पैदल यात्रीको सहजताको लागि कोशी राजमार्ग अन्तरगत दुई वटा स्थानमा आकाशे पुल निर्माण गर्न लागिएको हो ।
आर्थिक वर्ष २०८०/८१ मा आकासे पुल निर्माणको लागि विनियोजन भएको बजेट नाफामूलक सहकारीलाई प्रदान गरिएको थियो । बारम्बार दोहोरिएको सो परियोजना पुनः सफल हुनेमा आशङ्का गरिएको छ ।
वर्तमान जनप्रतिनिधिको पहिलो वर्ष ल्याएको जेठ मसान्त भित्र योजना सम्पन्न गर्ने नीति समेत दोहोरिएको छ ।
विगतमा समेत कार्यान्वयन नभएको नीति पुनः दोहोरिएको हो । एसियाली विकास बैङ्क र जाइका सँगको सहकार्यमा डुबान नियन्त्रण र सडक पूर्वाधारको विस्तृत परियोजना प्रतिवेदन तयार पार्ने उल्लेख छ । बाढी तथा डुबान नियन्त्रणलाई प्राथमिकता राख्दै चालु आर्थिक वर्षको बजेट समेत कार्यान्वयनमा छ ।
यसअघि तीन पटक सूचना निकालेर अतिक्रमित भवन तथा संरचना भत्काउने तयारी गरेको कार्यक्रमलाई बजेटमा समेटिएको छ ।
खेती खोला, सुकुमारी पैनी तथा खोला पैनीको अतिक्रमित संरचना हटाउने उल्लेख गरिएको छ । त्यस बाहेक खोलाको राइट अफ वे स्पष्ट नभएको अवस्थामा कोरिडोरको योजना सार्वजनिक भएको छ । टेङ्ग्रा खोला किनारमा कोरिडोर स्थापना गर्न लागिएको हो ।
