धरान : स्वास्थ्य मन्त्री निशा मेहता र गृहमन्त्री सुदन गुरुङले आइतबार धरानस्थित बिपी स्वास्थ्य विज्ञान प्रतिष्ठानको निर्माणाधीन एमसीएच मातृ तथा शिशु भवनको अनुगमन गरेका छन् ।
प्रतिष्ठान पुगेका मन्त्री द्वयले भवन निर्माणको प्रगति,पूर्वाधारको अवस्था तथा सञ्चालन तयारीबारे जानकारी लिएका हुन ।
अनुगमनका क्रममा सञ्चारकर्मीहरूले बिपी स्वास्थ्य विज्ञान प्रतिष्ठानलाई प्रस्तावित छाता ऐन अन्तर्गत लैजाने विषयमा सरकारको धारणा के हो भन्ने प्रश्न गरेका थिए । तर स्वास्थ्य मन्त्री मेहताले उक्त विषयमा अहिले प्रतिक्रिया दिन नचाहेको जनाउँदै ‘पछि बोल्ने’ भन्दै प्रश्नको जवाफ दिएनन् ।
स्वास्थ्य मन्त्री मेहता, गृहमन्त्री गुरुङले आजै प्रतिष्ठानका पदाधिकारी तथा स्वास्थ्य निर्देशनालयका प्रतिनिधिसँग ३ घण्टा छलफल गरे। उक्त छलफल प्रतिष्ठानको आन्तरिक भएको सञ्चारकर्मीलाई प्रवेश दिइएन । प्रतिष्ठानमा लामो समयदेखि उपकुलपतिको नियुक्ती भएको छैन ।
मन्त्रीद्वयको अनुगमन, आन्तरिक छलफलले गरेको कुनै निर्णय सार्वजनिक गरिएको छैन । उपकुलपति नियुक्तिको ढिलाई प्रतिष्ठानलाई छाता ऐनमा प्रवेश गराएर भूमिका सीमित गरिने हो कि भन्ने प्रतिष्ठानका सरोकोरवालाहरुमा चिन्ताको विषय बनेको छ ।
