धरान :धरान–१४ स्थित इतिहासमा लिम्बुवानको राजधानी विजयपुर सिरान दरबार स्थलको जङ्गलमा आज शनिवार वृहत् सरसफाई कार्यक्रम भएको छ । सरसफाई कार्यक्रम विजयपुर दरबार संरक्षण सङ्घर्ष समितिले आयोजना गरेको हो ।
पञ्चकन्या जङ्गल स्थित गढीको शिखरबाट सुरु गरिएको सरसफाई पञ्चकन्या मन्दीरमा आएर समापन भएको थियो । समापनमा किरात याक्थुङ चुम्लुङ धरानका अध्यक्ष तीर्थ मादेम्बाले लिम्बुवानको राजधानी विजयपुर दरबार क्षेत्रको ऐतिहासिक र सांस्कृतिक महत्त्व जोगाउने दायित्व सबैको भएको बताए ।
सरसफाई कार्यक्रममा सहभागीहरूले दरबार क्षेत्रका कुनै पनि संरचना नछुई र नढाली र बोट बिरुवा नभाँच्न आग्रह गर्दै सरसफाईमा सहभागी हुन आग्रह गरे । सहभागीहरूले विजयपुर दरबार संरक्षण जिन्दाबाद, सांस्कृतिक अतिक्रमण बन्द गर, विजयपुर हाम्रो प्राण हो, विजयपुरको इतिहास जिन्दाबाद, लगायतका नारा लगाएका थिए ।
सङ्घर्ष समितिका संयोजक सुवास हुक्पाचोङवाङले बिजयपुर दरबारको संरक्षणका लागि भएको सङ्घर्षको इतिहासलाई सम्मान गर्न साउन २२ गते विजयपुरमा राजनीतिक तहका नेताहरूको सहभागितामा वृहत् कार्यक्रम आयोजना गर्ने तयारी भइरहेको जानकारी दिए । उनले विजयपुर दरबार क्षेत्रमा भैरहेको सांस्कृतिक अतिक्रमणका गतिविधि रोक्न माग गरे ।
प्रतिनिधिसभामा विजयपुरको इतिहासको विषयमा मोरङ–१ का सांसद यज्ञमणि न्यौपानेले उठाएको सवालप्रति लिम्बु समुदायको ध्यानाकर्षण भएको बताउँदै साउन २२ गतेको सभामा सांसद न्यौपाने समेत सहभागी हुने उनले बताए ।
