धरान : संस्कृति,पर्यटन तथा नागरिक उड्डयन मन्त्री खडकराज पौडेल शनिवार धरानका धार्मिक, सांस्कृतिक तथा पर्यटकीय स्थलहरूको अवलोकनका क्रममा धरान–१४ स्थित हाल सर्वाधिक चर्चामा रहेको विजयपुर दरबार परिसर अवलोकन गर्न पुगेका छन् ।
भ्रमणका क्रममा मन्त्री पौडेलले विजयपुर दरबारको अवलोकन गरे पनि दरबार स्थलमा राखिएका चिन्डोसँग जोडिएको विवादका विषयमा कुनै प्रतिक्रिया दिन चाहेनन् ।
मन्त्री पौडेलले धरानमा रहेका विभिन्न मठ–मन्दिरको अवलोकन गर्दै सबै धर्म,जाति र समुदायका साझा सम्पदालाई संरक्षण तथा प्रवर्द्धन गरी पर्यटन विकासमा जोड दिनुपर्ने बताए ।
भ्रमणका क्रममा उनले धरान–१४ स्थित आदिवासी जनजाति बहु सांस्कृतिक सङ्ग्रहालय र धरान–१६ स्थित बहुभाषिक पाठशालाको पनि अवलोकन गरे ।
धरान–१४ स्थित आदिवासी जनजाति बहु सांस्कृतिक सङ्ग्रहालय भवनमा आयोजित स्वागत तथा भेटघाट कार्यक्रममा मन्त्री पौडेलले भौतिक संरचना निर्माण मात्र विकास नभई गुणस्तरीय सेवा र व्यवस्थापन नै वास्तविक विकासको आधार भएको बताए ।
उनले भने,“अस्पताल,विद्यालय र सडक निर्माण गरेर मात्र विकास हुँदैन, ती संरचनाले गुणस्तरीय सेवा दिन सकेपछि मात्र विकासको अनुभूति हुन्छ ।”
मन्त्री पौडेलले वर्तमान सरकारले कार्यालय समयमा नियमित रूपमा काम गर्ने र बिदाको दिन जनतामाझ पुगेर समस्या बुझ्ने तथा अनुगमन गर्ने अभ्यासलाई निरन्तरता दिएको बताए ।
उनले स्थानीय तहको निर्वाचनमा जित–हारभन्दा पनि जनसेवा नै सरकारको प्राथमिकता भएको बताउँदै पार्टीलाई विभाजन गर्ने प्रयास भए त्यसको प्रतिकार गर्दै उच्च मनोबलका साथ सक्रिय रहन कार्यकर्तालाई आग्रह गरे ।
धरान भ्रमणका क्रममा मन्त्री पौडेलले धरान–२० स्थित माछा मारामा रहेको गोर्खा स्मृति पार्कको समेत अनुगमन गरे ।
