धरान : विजयपुर दरबार परिसरमा राखिएको राई जातिको प्रतीक चिण्डो अज्ञात समुहव्दारा तोडफोड गरी उखेलेको घट्नाप्रति विजयपुर दरबार परिसर संरक्षण समितिले आज सोमवार प्रेस विज्ञप्ति जारी गर्दै दुःख व्यक्त गरेको ।
विज्ञप्तिमा ‘हामीले सुरुदेखि नै यस विषयलाई वार्ता, संवाद र आपसी समझदारीका आधारमा समाधान गर्न निरन्तरता दिँदै आएको’ उल्लेख गर्दै यस घट्नाले विवादलाई थप जटिल बनाउन सक्ने भएकाले सबै पक्षलाई संयमता अपनाउन अनुरोध गरेको छ ।
विजयपुर दरबार परिसरमा राखिएको चिण्डो बारे विवाद उत्पन्न भएपछि त्यसलाई वार्ता र संवादबाट समाधान गर्न किरात राई यायोख्खा र विजयपुर दरबार परिसर संरक्षण सङ्घर्ष समिति बिच साउन ३ गते देखी वार्ता सुरु भएको छ ।
पहिलो दिनको वार्ता विना निष्कर्ष टुङ्गिएको उल्लेख गर्दै विज्ञप्तिमा भनिएको छ ‘तथापि दुवै पक्षले थप गृहकार्य गर्ने,आ-आफ्नो मातहतका समितिहरूसँग छलफल गर्ने तथा पुनः वार्तामा बस्ने भद्र सहमति गरेका थियौ ।’
आगामी दिनमा यही प्रतिबद्धतालाई निरन्तरता दिई वार्ता, संवाद,आपसी समझदारीबाट समाधान गर्न सबै पक्षलाई कुनै पनि उत्तेजनात्मक वा एकपक्षीय गतिविधिबाट टाढा रहन वक्तव्य मार्फत आग्रह गरिएको छ ।
