धादिङ : धादिङमा बस र स्कुटर ठोक्किँदा नायिका महिमा सिलवाल र उनकी बहिनीको मृत्यु भएको छ । बुधबार बेलुकी पृथ्वी लोकमार्गको गजुरी गाउँपालिका वडा नम्बर २ चाम्बासमा भैरहवाबाट काठमाडौंका लागि छुटेको लु २ ख १३५ नम्बरको बस र बा ९८ प ७०५८ नम्बरको स्कुटर आपसमा ठोक्किएको थियो ।
बहिनीको ‘इगेजमेन्ट’मा चितवन जाँदै गर्दा बुधबार राति दुर्घटना भएको हो । दुर्घटनामा घाइते भएकी महिमाको गजुरीमा रहेको प्राथमिक स्वास्थ्य केन्द्रमा बुधबार नै ज्यान गएको प्रहरी नायब उपरीक्षक (डीएसपी) खगेन्द्र खड्काले जानकारी दिए ।
उहाँका अनुसार दुर्घटनामै घाइते भएकी महिमाकी बहिनी शर्मिलाको बिहीबार बिहान काठमाण्डौको ट्रमा सेन्टरमा ज्यान गएको हो । महिमाले ’कारबाही’, ’अप्रिल फुल’, ’चियर्स’, ’दानव’ लगायतका चलचित्रका साथै दर्जन बढी म्युजिक भिडियोमा अभिनय गरेकी छिन् । बससहित चालकलाई प्रहरीले नियन्त्रणमा लिएको छ ।
