इटहरी : नेपाली काँग्रेस इटहरीले गठबन्धनलाई मूर्तरूप दिने तयारी थालेको छ। उपमहानगर समितिको बैठकको क्रममा नेताहरूले गठबन्धनलाई स्वीकार गरे पनि मेयर उपमेयर नछाड्ने बताए। 

मेयर उपमेयरका आकाङ्क्षी लगायत नेताहरूले वडा स्तरमा मात्र गठबन्धनका दलहरूलाई भाग दिन सकिने बताएका हुन् । नेपाली काँग्रेस केन्द्रीय सदस्य राजीव ढुङ्गानाले गठबन्धनको नाममा प्रमुख उपप्रमुख नछाड्ने अडान लिए । कम्युनिस्टहरू एक हुँदा काँग्रेसले हार बेहोर्नुपरेको स्मरण गराउँदै उनले गठबन्धन बाध्यता भएको धारणा राखे । 
अत्यन्तै कमजोर जनाधार भएका पार्टीले ठुलो भाग माग्दा गठबन्धन प्रभावकारी नहुने उनको तर्क छ । काँग्रेस आफै चुनाव जित्न सक्षम भएको बताउँदै ढुङ्गानाले अन्य दलको सहयोग मात्र चाहेको बताए । यस पटक चुनावमा अन्तर्घात गर्ने र असहयोग गर्ने नेता कार्यकर्तालाई तत्काल पार्टी सदस्यताबाट निष्कासित गरिने उनले घोषणा गरे । 
मेयरको दाबेदारी प्रस्तुत गरेका नगर सभापति हेमकर्ण पौडेलले काँग्रेसको विजयीमा कुनै संशय नभएको बताए । गठबन्धनलाई कार्यान्वयनमा आवश्यकता र औचित्य पुष्टि हुनेगरि गरिने उनको भनाई छ । 
बैठकमा बोलेका अधिकांश मेयरका आकाङ्क्षीले काँग्रेस भित्रको गठबन्धन महत्त्वपूर्ण रहेको धारणा राखे । काँग्रेस बिचको एकता नै जितको आधार भएको उनीहरूको ठम्याई छ । 
इटहरीको दुर्गा पार्टी प्यालेसमा भएको कार्यक्रममा १० जनाले मेयरमा दाबेदारी प्रस्तुत गरेका छन् । नगर सभापति पौडेल सहित २०७४ को मेयरका उम्मेदवार रोहित प्रसाईँ, विकाश केसी, भीम बहादुर पौडेल, सूर्य राई, रामरोहन चौधरी, नागेशचन्द्र राई, विष्णु बहादुर डाँगी र कल्पना चौधरीले मेयरमा दाबेदारी प्रस्तुत गरेका छन्। 
त्यस्तै उपमेयरमा अघिल्लो निर्वाचनकी उम्मेदवार विमला ढकाल सहित उर्मिला चौधरी, बबीता चौधरी, निर्मला चौधरी, गीता श्रेष्ठ, कौशीला सुनुवार चौधरी, सुशीला लेखी, सुशीला चौधरी, रुपा कार्की, मेनुका गिरि, शिला गजमेरले उम्मेदवारी प्रस्तुत गरेका छन् ।