 (13)_1727965004.gif)
इटहरी : नेपाल पत्रकार महासङ्घको १३ औँ साधारण सभा सम्पन्न भएको छ । शनिवार इटहरीको लायन्स क्लबमा प्रदेश १ आन्तरिक मामिला तथा कानुन मन्त्री केदार कार्कीको प्रमुख आतीथ्यतामा कार्यक्रम सम्पन्न भएको हो ।
खुल्ला सत्र र बन्द सत्रका विभाजित कार्यक्रममा २ सय बढी साधारण सदस्यको उपस्थिति जनाए । बन्द सत्रमा धारणा राख्ने अधिकांश सदस्यहरूले वर्तमान नेतृत्वको आलोचना गरेका थिए । पत्रकारको हक हितमा महासङ्घले ठोस कदम अगाडी बढाउन नसकेको उनीहरूको बुझाई थियो ।
महासङ्घ पत्रकारहरूको साझा बन्न नसकेको बताउँदै सदस्यहरूले शुद्धीकरणको मुद्दा उठाए । सदस्यहरू सुविद गुरागाईँ, पर्शुराम बाह्रकोटी (विनय), कृष्ण भट्टराई, भरतराज शर्मा, अर्जुन सुवेदी र नवराज विष्टले शुद्धीकरणको लागि विशेष प्रस्ताव दर्ता गराएका थिए । प्रस्ताव उपर छलफल गरेको अध्यक्ष मण्डलले सदस्यता छानबिन गरी शुद्धीकरण गर्न निर्देशन दिएको छ ।
अध्यक्ष मण्डलका अध्यक्ष हर्ष सुब्बाले महासङ्घ सुनसरीको साधारण सभा सौहार्दपूर्ण रूपमा सम्पन्न भएको बताए । सदस्यहरूले उठाएका विषयको सुनुवाइ गर्न निर्देशन दिँदै उनले शुद्धीकरणको कार्य अगाडी बढाउनुपर्ने सुझाव दिए ।
महासङ्घ जिल्ला सचिव ध्रुव ढकालले साङ्गठनिक प्रतिवेदन र कोषाध्यक्ष अजित झाले आर्थिक प्रतिवेदन पेस गरेका थिए । दुवै प्रतिवेदनमा उठेका प्रश्नलाई संशोधन गर्ने लिखित प्रतिबद्धता सहित सर्वसम्मतिले पारित भएको थियो ।
