सुनसरी : धरान उपमहानगरपालिका प्रमुख हर्क साम्पाङका समर्थकले सामाजिक सञ्जालमा अत्यन्तै अशोभनीय गालीगलौज गरेको भन्दै वडा नम्बर १७ का वडा अध्यक्ष मनोज भट्टराई साइबर ब्युरोमा उजुरी दिने भएका छन् । उनले आफूमाथि परिवारमा बसेर हेर्नै नसकिने तथा सुन्नै नसकिने शब्द प्रयोग गर्दै अपमान गरेको भन्दै साइबर ब्युरोमा उजुरी दिन लागेका हुन् । 
उनी आजै (सोमबार) काठमाडौँ गएका छन् । यहाँबाट कानुनी प्रक्रिया लामो हुने भएकाले काठमाण्डौं नै गएर उजुरी दिन लागेको उनले बताए । कार्यपालिका विवाद बारे आफ्ना भनाई सञ्चारमाध्यममा राख्दा कमेन्ट बक्समा फोटोलाई तोडमोड गर्ने, पसर्शनल म्यासेन्जरमा जाली गर्ने तथा मोबाइलमा सम्पर्क गर्दै एकोहोरो गाली गर्ने जस्ता क्रियाकलापले आफू माथि सुरक्षा थ्रेट नै हुन सक्ने भन्दै उजुरी हाल्न बाध्य भएको बताए ।
‘उहाँका शुभचिन्तकहरूले परिवारमा बसेर हेर्न नसकिने म्यासेज गर्ने, कमेन्ट गर्ने, टेलिफोन गरेर धम्काउने गर्नु भयो । त्यसका विरुद्ध कानुनी प्रक्रियामा जान लागेको हो ।’ कपुरी न्युजसँग कुरा गर्दै भने “मलाई विश्वास छ, त्यस्ता फेक एकाउन्टबाट म माथि भएको अपमानलाई साइबर ब्युरोले खोजी गर्ने छ ।”
त्यस्तै नगर प्रमुख तथा उनका समर्थकले सम्पत्ति छानबिन गर्ने विषयमा समेत उनले वडा अध्यक्ष भट्टराईले आपत्ति जनाएका छन् । उनले आफू देशको नीति नियमलाई मानेर वार्षिक सम्पत्ति विवरण बुझाउँदै आए पनि कुनै व्यक्तिले बजारमा, चौकमा छानबिन गर्छु भन्नुले उहाँ शासक हुन खोजेको टिप्पणी गरे । "उहाँहरू सम्पत्ति छानबिन गर्ने अख्तियार हो कि, सम्पत्ति शुद्धीकरण आयोग हो कि, उहाँ सर्वोच्च अदालत हो कि" भट्टराईले भने ‘उहाँ आफैँ के गरिबक्सन्छु भन्नुहुन्छ, के उहाँ श्री ५ को सरकार हो ?’, उनले नगर प्रमुख भएर आफ्नो काम कर्तव्य नबुझेको भन्दै आगामी दिनमा यस्तो आक्षेप नलगाउन समेत आग्रह गरेका छन् ।