धरान : वीपी कोइराला स्वास्थ्य विज्ञान प्रतिष्ठानको शिक्षाध्यक्षमा प्रा.डा.सञ्जीव कुमार शर्मा नियुक्त भएका छन् । तत्कालीन शिक्षाध्यक्ष प्रा.डा.गुरु प्रसाद खनालको पदावधि गत असोज २६ मा समाप्त भए पश्चात् रिक्त रहेको उक्त पदमा ईन्टर्नल मेडिसिन विभागका प्रा.डा.सञ्जीव कुमार शर्मा नियुक्त भएका हुन ।
प्रतिष्ठानको ऐन २०४९ को दफा ११ (ग) (१) बमोजिम प्रतिष्ठानका उपकुलपति डा.ज्ञानेन्द्र गिरीको सिफारिसमा प्रतिष्ठानका सहकुलपति स्वास्थ्य मन्त्री भवानी प्रसाद खापुङ्गले शर्मालाई  नियुक्त गरेका हुन । प्रतिष्ठानको शिक्षाध्यक्ष पदमा नियुक्त भएका प्रा.डा.शर्माको कार्यकाल ५ वर्षका लागि हुनेछ । 
प्रा.डा.खनालको पदावधि समाप्ति पश्चात् हालसम्म डीन, परीक्षा, प्रा.डा.श्याम थापा क्षेत्रीलाई निमित्त शिक्षाध्यक्षको अतिरिक्त जिम्मेवारी दिइएको थियो ।    
त्यसै गरी प्रतिष्ठानको ऐन, २०४९ को दफा ७ को उप(दफा (१) (ध) बमोजिम प्रतिष्ठानका शिक्षकहरू मध्येबाट उपकुलपतिको सिफारिसमा सहकुलपतिले स्कुल अफ पब्लिक हेल्थ एण्ड कम्युनिटी मेडिसिनका प्रा.डा.नीलाम्बर झा तथा माइक्रोबायोलोजी विभागका प्रमुख डा.नारायण राज भट्टराईलाई सञ्चालक परिषद् सदस्यमा मनोनीत भएका छन् । मनोनीत भएका प्रा.डा.झा तथा डा.भट्टराईको कार्यकाल ४ वर्षको हुने प्रतिष्ठानले जानकारी दिएको छ ।