इटहरी : प्रदेश १ ले पुष २५ गते नयाँ सरकार पाउने भएको छ । प्रदेश प्रमुख पर्शुराम खापुङले प्रदेश सरकार गठनको आव्हान गरे सँगै सरकार गठनको बाटो खुल्ला भएको हो ।
पुष १६ गते दोस्रो प्रदेशसभाको पहिलो बैठक बसेकै दिन प्रदेश प्रमुखले सरकार गठनको लागि आव्हान गरेका हुन् । संविधानको धारा १६८ को उपधारा (२) बमोजिम प्रदेश सरकार गठन गर्न आग्रह गरेका छन् ।
धारा १६८ को उपधारा (१) अनुसार कुनै पनि राजनैतिक दलको बहुमत नभएकाले उपधारा २ बमोजिम सरकार गठन हुने भएको छ । आइतबार जारी विज्ञप्तिमा 'प्रदेश नं. १ को प्रदेशसभामा प्रतिनिधित्व गर्ने दुई वा दुई भन्दा बढी दलहरूको समर्थनमा बहुमत प्राप्त गर्न सक्ने प्रदेश नं. १ को प्रदेश सभाको सदस्यलाई प्रदेश नं.१ को मुख्यमन्त्री नियुक्त गर्नका लागि मिति २०७९ पुस २४ गते आइतबार बेलुकी ५ बजेभित्र दाबी पेस गर्न माननीय प्रदेश प्रमुखज्यूबाट आव्हान भएको छ,' भनी उल्लेख छ ।
प्रदेश १ मा सत्तारुढ गठबन्धन अन्तरगत नेकपा एमाले र नेकपा माओवादी केन्द्रको संयुक्त सरकार बन्ने प्रष्ट भएको छ । नेकपा एमालेको नेतृत्वमा सरकार गठन गर्ने अन्तिम तयारीमा रहेका सत्तारुढ दलहरू बाकी मन्त्रालय र सभामुख उपसभामुखको भागबन्डाको तयारीमा छन् । एमालेको तर्फबाट हिक्मत कार्की मुख्यमन्त्री बन्ने भएका छन् ।
