उदयपुर : उदयपुरबाट सञ्चालित उपहार एफएम ९५.४ मेघाहर्जको ५ औ वर्ष पुरा भएको अवसरमा उदयपुरमा म्युजिक अवार्ड हुने भएको छ । उपहार मिडिया ग्रुप प्रालीद्वारा सञ्चालित उपहार एफएमले आफ्नो स्थापनाको ५ औ वार्षिक उत्सवको अवसर पारेर म्युजिक अवार्ड गर्न लागेको हो । 
उदयपुर जिल्लाकै इतिहासमा पहिलो पटक आयोजना गर्न लागिएको म्युजिक अवार्डमा विभिन्न विधामा एक दशक यात्रा साङ्गीतिक क्षेत्रमा क्रियाशील गायक, सङ्गीतकार, रचनाकार तथा कला क्षेत्रमा क्रियाशीलहरूलाई अवार्ड वितरण गर्ने कार्यक्रम रहेको आयोजकले जनाएको छ । 
कला र संस्कृतिको पहिचान अग्रजलाई सम्मान नयाँलाई प्रोत्साहन भन्ने मूल मर्म र भावना सहित आयोजना गर्न लागिएको म्युजिक अवार्डमा नेपाली साङ्गीतिक क्षेत्रका सफल सङ्गीतकार शिलाबहादुर मोक्तान र कुन्ती मोक्तानलाई लाइफ अचिभमेन्ट अवार्ड सहित सम्मान तथा मोक्तान दम्पतीद्वारा उदयपुरका कलाकारहरूलाई अवार्ड वितरण गरिने छ । कार्यक्रममा उदयपुरका स्थापित तथा नवोदित युवा कलाकारलाई अवार्ड प्रदान गरिने छ  । कार्यक्रममा उदयपुरबाट स्थापित कलाकारहरू सहित सङ्गीतकार शिलाबहादुर मोक्तान र कुन्ती मोक्तानले समेत साङ्गीतिक प्रस्तुति रहने  छ । 
आगामी फागुन १० गते हुने कार्यक्रमको लागि विभिन्न क्षेत्र सँग समन्वय गरेर प्रायोजन, सह-प्रायोजन तथा विशेष सहयोगको लागि प्रस्तावना सहित अपिल गरिने उपहार मिडिया ग्रुप प्रा.लिका अध्यक्ष विश्वराज तामाङले जानकारी दिए । 
कार्यक्रममा साङ्गीतिक सांस्कृतिक प्रस्तुति सहित फेशन सो तथा विभिन्न कार्यक्रमहरूको आयोजना गरिने तयारी रहेको जनाइएको छ । उदयपुरमा २०७५ सालबाट प्रसारण प्रारम्भ भएको रेडियोले आफ्नो ५ औ स्थापना वर्षको अवसरमा सो कार्यक्रम आयोजना गर्न लागेको हो । विगतमा पनि विभिन्न चाडपर्वहरूमा रेडियोले विभिन्न नागरिकका अभिरुचिका कार्यक्रमहरू आयोजना गर्दै आएको थियो ।