झापा : झापाको दमक ६ स्थित नमुना बजारमा आज बिहान आगलागी भएको छ । 
बिहान करिब ३ बजेबाट आगलागी सुरु भएको अनुमान गरिएको छ । नमुना बजारमा रहेको राज श्रेष्ठको पसलबाट आगलागी सुरु भएको बताइएको छ । श्रेष्ठको पसलसँगै अन्य ६ वटा पसल पनि जलेर नष्ट भएको छ भने नजिकै रहेका अन्य पसलहरूलाई जोगाउनका लागि त्यहाँका सरसामान अन्यत्रै सारिएको छ । यस्तै सोही स्थानमा रहेको घिमिरे मार्केटमा समेत आगोले क्षति पुर्‍याएको छ ।
घिमिरे मार्केटमा रहेका केही पसलहरूमा आगोले क्षति पुर्‍याएको हो । आगलागी नियन्त्रणका लागि दमकका २ वटा दमकल, गौरादह, कानेपोखरी, लेटाङ, शुन्दरहरैंचा, कमल लगायतका स्थानबाट आएका अन्य दमकलसहित दमक प्रहरी र स्थानीयवासीको सहयोगमा आगो नियन्त्रणको प्रयास गरिएको थियो । 
आगो अहिले पनि पूर्ण रूपमा भने नियन्त्रणमा आइसकेको छैन । बिद्युत् सर्ट भएर आगलागी भएको अनुमान गरिएको छ ।