- रश्मि प्रधान
धरान : प्रहरीले धरानमा मङ्गलवार लागू औषध खैरो हेरोइन सहित पक्राउ तीन जनालाई पक्राउ गरेको छ । इलाका प्रहरी कार्यालयले बुधवार पत्रकार सम्मेलन गरी उक्त जानकारी दिएको हो । पक्राउ पर्नेहरूमा धरान वडा-१५ सदन रोड बस्ने रन्सुर राई, २४ वर्षीय दीपक विश्वकर्मा, ३१ वर्षीय सनोज राई छन् ।
प्रहरी अनुसार सदन रोडका रन्सुर राई समेतले लागुऔषध खैरो हेरोइनको कारोबार गर्छन् भन्ने सूचनाको आधारमा माघ ३ गते साढे ९ बजे राती उनको कोठमा प्रहरी टोलीले छापा मारेको थियो । कोठामा पुग्दा सोही राई र विश्वकर्मालाई फेला परेको इलाका प्रहरी कार्यालय प्रमुख डिएसपी बुद्ध श्रेष्ठले बताए ।
तत्काल घर कोठा खानतलासी गर्दा ४ ग्राम ५०० मिलिग्राम खैरो हेरोइन जस्तो देखिने धुलो पदार्थ र २०० ग्राम गाँजा जस्तो देखिने अवैध लागुऔषध बरामद गरिएको बताइएको छ । पक्राउ गरिएकाहरू उपर लागुऔषध कारोबारीको अभियोगमा थप अनुसन्धान भइरहेको छ ।
उनीहरूलाई सुनसरी जिल्ला अदालतबाट म्याद थप गरी इलाका प्रहरी कार्यालय धरानबाट थप अनुसन्धान कार्य भई रहेको डिएसपी श्रेष्ठले बताए ।
