विराटनगर : धनकुटा र मोरङको छुट्टाछुट्टै दुई स्थानबाट ९० किलो १०० ग्राम लागुऔषध गाँजा सहित ६ जनालाई प्रहरीले पक्राउ गरेको छ । 
हिजो शनिवार बिहान धनकुटाको साँगुरीगढी गाउँपालिका १ उखुडाँडा स्थित कोसी लोकमार्गमा प्रहरी चौकी मुलघाटबाट खटिएको प्रहरी टोलीले चेकजाँचको क्रममा धनकुटाबाट धरान तर्फ आउँदै गरेको को १ ख २८३३ नम्बरको यात्रुवाहक बसको हुट र डिक्कीमा राखेको झोलाबाट ४० किलोग्राम गाँजा बरामद गरेको हो । 
चेक जाँचकै क्रममा सोही बसमा सवार रहेका सहिदभूमी गाउँपालिका १ धनकुटाका ३२ वर्षीय सुरज राईको साथबाट ४० ग्राम, र २२ वर्षीय सुरेश राईको साथबाट ६० ग्राम गाँजा बरामद भएको थियो । लागुऔषध गाँजा बरामद भए सँगै उक्त बस र बसका चालक सुन्दरहरैचा ५ मोरङका ५१ वर्षीय रुद्ध बहादुर तामाङ, सहचालक सहिदभूमी गाउँपालिका ७ का ४३ वर्षीय फत्तेमान राई र चौबिसे गाउँपालिका ५ धनकुटा का २९ वर्षीय सुरेन्द्र देवान समेतलाई पक्राउ गरिएको छ । 
पक्राउ परेका उनीहरूको  जिल्ला प्रहरी कार्यालय धनकुटाबाट थप अनुसन्धान भइरहेको छ ।
यसैगरी शनिवार बेलुका पौने ७ बजे विराटनगर महानगरपालिका ११ स्थित बसपार्कबाट ५० किलोग्राम गाँजा सहित धनकुटा सहिदभुमि गाउँपालिका ४ का ४४ वर्षीय यज्ञ प्रसाद राईलाई  प्रहरीले पक्राउ गरेको छ। राईले साग र तेजपत्ताको तीन वटा बोरामा गाँजा लुकाई छिपाई ल्याएको अवस्थामा वडा प्रहरी कार्यालय विराटनगरबाट खटिएको प्रहरी टोलीले पक्राउ गरेको हो । 
लागुऔषध गाँजा सहित पक्राउ परेका राईको जिल्ला प्रहरी कार्यालय मोरङबाट थप अनुसन्धान भइरहेको छ ।