धरान : कोशी प्रदेशको नामाङ्कन विरोध गर्दै किरात मोर्चा नामक नयाँ सङ्गठनले फागुन २५ गते आम हडताल सहितको बन्द आव्हान गरेको विज्ञप्ति अहिले सामाजिक सञ्जालमा भाइरल भइरहेको छ। केन्द्रीय अध्यक्ष मिसेकहाङ किरातको नाममा जारी विज्ञप्तिमा किरात सभ्यता, राष्ट्रियता, इतिहासलाई अपमान बेवास्ता गरेर कोसी प्रदेश घोषणा ठुलो अपमान र अपराध भएकोले कोशी प्रदेशको विरुद्धमा भइरहेको आन्दोलनप्रति ऐक्यबद्धता जाहेर गर्दै बन्दको आव्हान गरिएको छ ।
विज्ञप्तिमा भनिएको छ ‘किरात राज्य (प्रदेश) घोषणा गर्न १ बुँदे माग राख्दै २०७९ फागुन २६ गते प्रदेश नं १ मा आम हडताल ९बन्द०को घोषणा गर्दछौँ ।’ बन्दको बेला एम्बुलेन्स, शव वाहन, दमकल, सुरक्षाकर्मीका साधन, अन्तर्राष्ट्रिय नियोगका साधन बन्द नहुने विज्ञप्तिमा उल्लेख छ । बन्द उल्लङ्घन गरेर क्षति हुन गए स्वयम् उल्ल्ंघनकर्ता, राज्य पक्ष जिम्मेवार हुनेछ भनिएको छ । 
कोसी प्रदेश नामाङ्कनको विरोधमा भइरहेको आन्दोलनमा ऐक्यबद्धता जनाउँदै बन्दको आव्हान अप्रत्याशित रूपमा आएको हो । विरोधका कार्यक्रमहरू लिम्बुवान, किरात संयुक्त सङ्घर्ष समितिले सुरु गरेको हो । यसमा राजनीतिक दल जनता समाजवादी पार्टी निकट पहिचान जनित सङ्गठनहरूले संयुक्त रूपमा ऐक्यबद्धता जाहेर गर्दै आन्दोलनका कार्यक्रमहरू सार्वजनिक गरेको थियो ।
कुमार लिङदेन नेतृत्वको सङ्घीय लोकतान्त्रिक राष्ट्रिय मञ्चले स्थानिय तहहरूमा तालाबन्दी, विरोध प्रदर्शन गर्दै आएको छ । राष्ट्रिय जनमुक्ति पार्टीले सुनसरी-१ क र ख का प्रदेश सभा सदस्य रमेश बस्नेत र विजय राईको निवासमा कालो झण्डा लगाएको जनाउनुका साथै विरोध प्रदर्शन, तालाबन्दीको आव्हान गरेको छ ।
kirat-banda