काठमाडौँ : भारतीय चर्चित तथा हिपहप गायक हनी सिंह पहिलो पटक नेपाल आउने भएका छन्। सिंह चैत २५ गते अप्रिल ८ काठमाडौँको बौद्धस्थित होटेल हयात रिजेन्सीको साङ्गीतिक कार्यक्रममा सहभागी हुने छन् ।
युनिफाइ नेपालको आयोजनामा हुने साङ्गीतिक कार्यक्रममा सिंहले सहभागिता जनाउने आयोजकले जनाएका छन् । हयातमा हुने उनको कार्यक्रमको टिकटको सबै मूल्य सम्बन्धी जानकारी ई(सेवामा राखिएको युनिफाई नेपालका रविन श्रेष्ठले जानकारी दिए
'साधारण टिकटको १ हजारदेखि माथि र भीआइपी टिकटको २ हजार रुपैयाँ भन्दा बढी हुन सक्नेछ । अहिले सम्पूर्ण टिकटको मूल्य निश्चित भइसकेको छैन,’ उनले भने,’ प्रि-बुकिङका लागि सम्पूर्ण टिकट इ-सेवाबाट प्राप्त गर्न सकिन्छ ।‘
सिंहका चर्चित गीत ब्लु आइज, धिरे धिरे र चार बोतल भोडका लगायतका गीतहरू चर्चित छन् । उनले नेपालमा हुने साङ्गीतिक कार्यक्रममा आफ्नो चर्चित गीतहरूको प्रस्तुति दिने श्रेष्ठले जानकारी दिए ।
युनिफाइ नेपालका रविन श्रेष्ठ, रितेश मारवाडी र एल्भिस रन्जीतसँगको भेटमा सिंहले नेपाल जान आतुर रहेको बताएका थिए । 'नेपाल भारतको छिमेकी मुलुक भएकाले पनि मलाई धेरै मन पर्छ । चाँडै नेपाल आउँदैछु,’ सिंहको भनाइ उद्धत गर्दै श्रेष्ठले भने ।
सिंह सङ्गीत कम्पोजर, र्यापर, गायक, गीतकार र एक अभिनेताका रूपमा परिचित छन् । उनले सन् २००३ देखि रेकर्डिङ कलाकारको रूपमा आफ्नो करियर सुरु गरेका थिए ।उनी साङ्गीतिक क्षेत्रमा लागेपछि भाङ्ग्रा र हिपहप गीत पनि गाएका छन् ।
सिंह आफ्नै गीतले सफल भएपछि उनले बलिउडका लागि पनि गीत गाएका छन् । सन् २०१२ मा पन्जाबी फिल्म ‘अन टोल्ड स्टोरी’ मा उनले अभिनय गरेका छन्।
