धरान : सुनसरीका चलचित्र पत्रकारहरूले आज धरानमा नेपाल चलचित्र पत्रकार सङ्घको वार्षिकोत्सव मनाएका छन् । उनीहरूले सङ्घ स्थापना भएको २४ औँ वार्षिकोत्सव मनाएका हुन् ।
पत्रकार महासङ्घ सुनसरीको सभाहलमा आयोजित वार्षिकोत्सवमा महासङ्घका सुनसरी जिल्ला अध्यक्षले केक काटेका थिए । उनी प्रमुख अतिथि थिए ।
पत्रकार महासङ्घका केन्द्रीय सदस्य तथा चलचित्र ‘पुरानो बुलेट’का निर्देशक भीषण राई वार्षिकोत्सवमा सहभागी चलचित्र पत्रकारहरूलाई शुभकामना दिदैं सामाजिक सञ्जाल युट्युबले चलचित्रको बजार खुम्च्याउँदै गएपनि मल्टिप्लेक्स हलहरूले हलमा जाने दर्शकहरू स्थिर राखेको बताए ।
सहसचिव भोला श्रेष्ठ लगायतका पत्रकारहरूले शुभकामना दिदैं चलचित्रको बजार प्रवर्धन गर्न चलचित्र पत्रकारहरूको महत्त्वपूर्ण भूमिका रहने बताए । कार्यक्रमको सभापतित्व चलचित्र पत्रकार सघ सुनसरीका अध्यक्ष विनोद विश्वकर्माले गरेका थिए । सञ्चालन उपाध्यक्ष मनोज दाहालले गरेका थिए ।
चलचित्र पत्रकार सङ्घ सुनसरी २०७७ फागुन १९ गते स्थापना भएको थियो । सङ्घले पहिलो वर्ष तीन दिने चलचित्र पत्रकारिता कार्यशाला, दोस्रो वर्ष पत्रकारहरूबिच मैत्रीपूर्ण फुटसल र कलाकार सम्मान गरेको थियो ।
यसवर्ष चलचित्र विकास बोर्डको सहयोगमा आउँदो जेठ २१ देखि २३ सम्म तीन दिने चलचित्र पत्रकारिता कार्यशाला गोष्ठी आयोजना गरिने अध्यक्ष विश्वकर्माले बताए ।