धरान : नेपाली काँग्रेसका संस्थापक नेता, नेपालमा २०४६ सालको जनआन्दोलनका सर्वोच्च कमाण्डर गणेशमान सिंहलाई धरानमा सम्झना गरिएको छ ।
उनको २७औँ स्मृति दिवस बुधवार गणेशमान सिंह छात्रवृत्ति तथा राहत कोषको आयोजनामा धरान-१६ स्थित गणेशमान चौकमा शालिकमा माल्यार्पण गर्दै सम्झना गरिएको हो । विहान माल्यार्पण तथा साँझ दीप प्रज्वलन गरिएको थियो ।
माल्यार्पणको अवसरमा काँग्रेस सुनसरी जिल्ला सचिव माधव घिसिङले गणेशमान सिंहको निष्ठ र त्याग मुलुकमा अहिले खट्किएको बताए । नेपाली जनतालाई सार्वभौम अधिकार सम्पन्न बनाउन गणेशमानको प्रतिबद्धता, समर्पण र योगदानको तुलना कसैसँग गर्न नसकिने उनको भनाई थियो ।
धरानका पूर्व मेयर, काँग्रेस महासमिति सदस्य तिलक राईले एक युगमा एक पल्ट यस्ता साहसी निष्ठावान् त्यागी महापुरुषको जन्म हुने बताउँदै भने ‘उहाँको पदचापमा हिडनु नै गर्वको विषय हुने बनेको छ ।’
काँग्रेस सुनसरी १ का सभापति सुजेन्द्र तामाङ, धरान उपमहानगर सभापति श्याम पोखरेल सहित काँग्रेसका अगुवा नेता कार्यकर्ताहरूको उपस्थितिमा स्मृति दिवस मनाइएको हो । कार्यक्रम गणेशमान सिंह छात्रवृत्ति तथा राहत कोष धरानका संयोजक विजय घिमिरेको संयोजनमा भएको थियो ।