धरान: काठमाडौँ महानगरपालिका–४ को आयोजनामा २ दिने ‘चेयरम्यान कप स्कुल चेस च्याम्पियनसिप’ बालुवाटारमा बुधवार सुरु हुँदैछ । हिमालयन चेस एकेडेमी एचसीएले व्यवस्थापन गर्ने च्याम्पियनसिपमा दर्जन बढी विद्यालयका २०० बढी खेलाडीले प्रतिस्पर्धा गर्ने भएका छन् ।
बुद्धिचाल खेलको माध्यमबाट स्थानीय विद्यार्थीको क्षमता अभिवृद्धि, प्रतिभा पहिचानसँगै अवसर सिर्जना गर्नका लागि वडा कार्यालयले चेयरम्यान कप स्कुल चेस च्याम्पियनसिप आयोजना गरेको वडाध्यक्ष दिनेश महर्जनले बताए । 
हिमालयन चेस एकेडेमीकी संस्थापक मोनालिसा खम्बुले चेसको माध्यमबाट बालबालिकामा रणनीतिक सोचको विकास हुने बताइन् । चेसले विद्यार्थीको बौद्धिक विकाससँगै अध्ययनलाई पनि राम्रो बनाउनले उनको भनाई छ ।
महेन्द्र राष्ट्रिय मावि वालुवाटरको हलमा सञ्चालन हुने प्रतियोगितामा कक्षाका आधारमा ब्वाइज र गल्र्सका गरी कुल ६ स्पर्धा हुनेछ । प्रतिस्पर्धा कक्षा १ देखि ४, कक्षा ५ देखि ८ र कक्षा ९ देखि १२ का विद्यार्थी सहभागी छन् ।
प्रत्येक स्पर्धामा शीर्ष दस खेलाडीले पदक प्राप्त गर्नेछन् । पदककै आधारमा विद्यालयलाई अङ्क दिइनेछ र सर्वाधिक अङ्क हासिल गर्ने विद्यालय चेयरम्यान कप च्याम्पियन बन्नेछ । उत्कृष्ट तीन स्कुलले पुरस्कार पाउनेछन् ।
च्याम्पियनसिपका टेक्निकल डिरेक्टर याईशाष यासिर खम्बुका अनुसार स्वीस प्रणालीअनुसार ७ राउन्डमा प्रतियोगिता सञ्चालन गरिनेछ । खेल १० मिनेट र प्रतिचाल वृद्धि १० सेकेन्डको हुनेछ । पहिलो दिन चार राउन्ड र दोस्रो दिन तीन राउन्डका खेल सञ्चालन गरिनेछ ।