धरान : नेपालमा पहिलो पटक बुद्धिचालको नयाँ विधामा आयोजित प्रतियोगिता ‘हिमालयन फ्रिस्टाइल चेस च्याम्पियनसिप’को उपाधि फिडेमास्टर एफएम क्षितिज भण्डारीले जितेका छन् ।
उनले फाइनलमा क्यान्डिडेट मास्टर सीएम मिलन लामालाई पराजित गर्दै उपाधि जितेका हुन ।
‘बेस्ट अफ थ्री’को आधारमा शुक्रवार काठमाडौँ दरबार मार्ग स्थित होटेल रोयल सिंगीमा भएको फाइनलमा क्षितिजले सुरुआती दुवै खेल जितेर २-० ले मिलनको चुनौती विफल बनाएका थिए ।
उनले सेमिफाइनलमा पुनम प्रसाईँलाई पराजित गरेका थिए भने मिलनले सुजन काफ्लेलाई हराएर उपाधि होडको यात्रा तय गरेका थिए ।
पूर्वविश्व चेस च्याम्पियन बबी फिसरले सुरु गरेको फ्रिस्टाइल चेस प्रतियोगिता नेपालमै पहिलो पटक भएको आयोजक हिमालयन चेस एकेडेमीले जनाएको छ ।
उपाधि विजेता क्षितिजले २५ हजार, उपविजेता मिलनले ९ हजार ६ सय, सेमिफाइनलमा रोकिएका पुनम र सुजनले समान ६ हजार ४ सय रुपैयाँ प्राप्त गरे ।
एकेडेमीको पहिलो वार्षिकोत्सवमा आयोजित प्रतियोगितामा कुल १ लाख २५ हजार रुपैयाँ पुरस्कार अर्को प्रतियोगिता ‘हिमालयन ब्लिज कप’ उपाधि राजन पुरीले जिते ।
स्वीस प्रणालीको आधारमा ९ राउन्ड सञ्चालित ब्लिज कपमा अपराजित रहँदै ७.५ अङ्क जोडेर राजनले पहिलो स्थान हात पारेका हुन ।
७ जित, १ हार र १ बराबरीसँगै मुहान नरसिंह श्रेष्ठले ७.५ अङ्क बनाएका थिए । तर, उनलाई टाइब्रेकरको आधारमा उछिन्दै राजन च्याम्पियन भएका हुन ।७ जित र २ हारको नतिजा सहित ७ अङ्क बनाएका अभिक शाह तेस्रोमा रहे । राजनले १५ हजार, मुहानले ७ हजार ५ सय र अभिकले ६ हजार रुपैयाँ हात पारे ।
१६ स्पर्धा समावेश ब्लिजमा महिला तर्फको उपाधि कुसुम तामाङले जितिन । गल्र्सतर्फ यू ८ मा रुबेश्री चौलागाइँ, यू १२ मा निहाना श्रेष्ठ, यू १४ मा नायुमा मगर र यू १६ मा प्रज्ञा पन्त प्रथम भइन् ।
ब्वाइजतर्फ यू ८ मा शुभांग प्रधान, यू १० मा अभियान राई, यू १२ मा दीपन मैनाली, यू १४ मा प्रवीर केसी र यू १६ मा अनमोल राई पहिलो भए ।
फिडे रेटिङ २००० मुनि सीताराम अग्रवाल, १७०० मुनि कृश अधिकारी, अनरेटेडतर्फ दिप्सन खड्का र एचसीएतर्फ आशीर्वाद थापा उत्कृष्ट घोषित भए । प्रतियोगितामा ५० खेलाडी सहभागी थिए ।
सात्विकमान सर्वोत्कृष्ट खेलाडी
हिमालयन चेस एकेडेमीले वर्षका उत्कृष्ट खेलाडीसँगै विभिन्न ८ अवार्ड पनि प्रदान गरेको छ । अवार्ड पाउनेहरूमा सात्विकमान तुलाधरले प्लेयर अफ दि इयर २०२४ अवार्ड जितेका छन् ।
प्रेमविक्रम अधिकारी दुई विधामा अवार्ड जित्ने एक्लो खेलाडी बने । उनले फेयर प्ले र अनलाइन एरिना अवार्डमा सफलता हात पारेका हुन ।
नायुमा मगरले कन्जेनियालिटी अवार्ड, प्रवीर केसीले ट्याक्टिकल टाइटन, निहाना श्रेष्ठले क्वीन्स अफ दि हिमालयज र शुभांग प्रधानले राइजिङ स्टार अवार्ड जिते ।
एकेडेमीले नेपालको पहिलो फिडे रेटेड खेलाडी सीताराम अग्रवाललाई लाइफटाइम एचिभमेन्टबाट नगद सहित सम्मान गर्याे ।
अवार्ड वितरणमा राष्ट्रिय खेलकुद परिषद्का सदस्यसचिव टङ्कलाल घिसिङ, पहिलो राष्ट्रिय चेस च्याम्पियन विकासमान लामा, एसियन गेम्सकी रजत पदक विजेता एरिका गुरुङ, करातेका मुख्य प्रशिक्षक कुशल श्रेष्ठ उपस्थित थिए ।
सरकारका पूर्व सचिव जीवनप्रभा लामा, फुटबल लिजेन्ड हरि खड्का, पेमा डोल्मा लामा, नेपाल बिलियर्ड, स्नुकर तथा पुल सङ्घका अध्यक्ष सरोजकुमार मुल्मी, काठमाडौँ वडा ११ का अध्यक्ष हिरालाल तण्डुकर, एकेडेमीकी संस्थापक, नेपाल बुद्धिचाल महासङ्घकी उपमहासचिव मोनालिसा खम्बूले पुरस्कार तथा अवार्ड वितरण गरेकी थिइन ।