_1749430366.gif)
विराटनगर : कोशी प्रदेश सरकारका मुख्यमन्त्री हिक्मतकुमार कार्कीले सबै मन्त्रालयमा पुगेका फायलहरूको काम ७ दिन भित्र किनारा नलागे कारण खुलाएर सम्बन्धित निकायलाई जानकारी गराउनु पर्ने निर्देशन दिएका छन् ।
प्रदेश सरकारको आर्थिक वर्ष २०८१/८२ को वार्षिक समीक्षा गोष्ठीमा मुख्यमन्त्रीले भने मुख्यमन्त्रीले भने ‘अब देखी सात दिनभित्र फाइल किनारा लगाउन नसक्ने भए के कारणले लागेन भन्ने कारण सहित सम्बन्धित निकायलाई जानकारी दिनु पर्यो ।’
मन्त्रालयमा पुगेका राय परामर्श र अन्य सबै खाले फाइल टुङ्गो लगाउन ढिलाइ भएकोमा ध्यानाकर्षण गराउँदै मुख्यमन्त्रीले भने ‘हामी कहाँ धेरै फाइल पनि हुँदैन तर अड्काउने प्रवृत्ति राम्रो होइन, यसमा सुधार होस, बेरुजु फर्छ्यौटमा पनि कडा रूपमा प्रस्तुत हुन जरुरी छ ।’
आर्थिक वर्ष २०८१/८२ को नीति तथा कार्यक्रम समीक्षामा प्रदेश सरकारका मन्त्री, सचिव र मन्त्रालयका महाशाखा प्रमुखहरूको सहभागी थिए । मुख्यमन्त्रीले बेरुजुको मामला लिखित रूपमा फर्छ्यौटको लागि अनुरोध गर्ने त्यसो नभए कानुनी प्रक्रिया अपनाएर अगाडि बढ्नुपर्ने बताए ।
उनले भने ‘नीतिगत बेरुजु र असुलउपर गर्नुपर्ने बेरुजु छुट्टाएर पुस मसान्तभित्र किनारा लगाइसक्नु पर्छ ।’ नीतिगत र प्रशासनिक कामलाई छिटो र छरितो बनाउनुपर्नेमा मुख्यमन्त्रीले जोड दिए ।
प्रदेश सरकारले प्रदेशको आर्थिक समृद्धिका लागि सुरु गरेको उदय परियोजना, ब्याज अनुदान कार्यक्रम, पर्यटन वर्ष, पदमार्गमा आधारित पर्यटन विकास र लगानी सम्मेलन मार्फत आएका परियोजनाहरूलाई प्राथमिकतामा राखेर काम गर्न उनले आग्रह गरे ।
उनले प्रदेशले अगाडि बढाएका योजनाहरूलाई प्राथमिकतामा दिएर काम गर्न आग्रह गर्दै भने ‘प्रदेश सरकार बनेपछि अधुरा छाडिएका र अलपत्र योजनाको विवरण मन्त्रालयहरूले तत्कालै तयार गर्नुपर्यो ।’
काम गर्न सुरु गर्यो अनि छोडिदिने प्रवृत्तिले योजनाहरू अलपत्र परिरहेकोले अब त्यस्तो चलनको अन्त्य हुनुपर्ने उनले बताए । मुख्यमन्त्रीले भने ‘त्यसैले त्यस्तो विवरण सङ्कलन गरेर ती काम प्राथमिकता दिएर अघि बढाउनु पर्छ ।’
प्रदेश सरकारका काम मात्रै होइन प्रदेशमा सङ्घीय सरकारले गरिरहेका काममा पनि समन्वय बढाएर नागरिकलाई सेवा दिन मुख्यमन्त्रीले कर्मचारीहरूलाई निर्देशन दिए ।
प्रदेश सरकारकी प्रमुख सचिव चन्द्रकला पौडेलले बेरुजु फर्छ्योट र ओएनएम सर्वेका काम साथै राजस्व कानुन लगायतका विषयलाई प्राथमिकतामा राखेर काम गर्नुपर्ने बताइन् ।
