धरान : सामाजिक सञ्जाल फेसबुकमा गाली–गलौज र बेइज्जती गरेको उजुरीको आधारमा पक्राउ गरिएको गणेश मगरलाई इलाका प्रहरी कार्यालय धरानले केही घण्टामै छोडेको छ ।
धरान-१५ बाट मङ्गलवार बिहान ८ बजे पक्राउ गरिएका मगरलाई भीडको दबाबका कारण अर्का व्यक्तिको जमानीमा छोड्नु परेको प्रहरीले बताएका छन् । इलाका प्रहरी कार्यालय प्रमुख डिएसपी भीषण बाबु राईले ठुलो भीडको दबाबका कारण उनलाई तत्काल हिरासतमा राख्न नसकिएको बताए ।
मगरलाई पीडित पत्रकार जनकऋषि राईले जेठ २७ गते इलाका प्रहरी कार्यालय धरानमा सामाजिक सञ्जालको दुरुपयोग गरी गाली–गलौज, मानहानि तथा चरित्रहत्या गरेको भन्दै विद्युतीय कारोबार सम्बन्धी प्रचलित कानुन अनुसार दर्ता गरेको उजुरीमा प्रहरीले पक्राउ गरेको थियो ।
पत्रकार राईले भने, ‘प्रहरीले मलाई फोन गरेर बोलाएको थियो, मैले फोनमा चतरामा छु, बेलुका ६ बजेतिर आउँछु भनेको थिएँ ।’ उजुरीकर्ता इलाका प्रहरीमा आउनु अघि नै प्रहरीले उनकै उजुरीमा पक्राउ गरेको व्यक्ति छोडेको हो ।
डिएसपी राईले भने, ‘यो ठ्रूलो कसुर पनि थिएन, ठुलो हुल आयो थाम्न सकिएन, सम्बन्धित व्यक्तिलाई सम्पर्क गर्दा उपस्थित हुन नसकेपछि रामकाजी राईको रोहवरमा प्रहरीले बोलाएको बेला उपस्थित हुने सर्तमा छोडिएको हो ।’
पत्रकार राई नेपाल पत्रकार महासङ्घ सुनसरीका पूर्व अध्यक्ष समेत हुन । प्रहरीले पत्रकारको केश सामान्य हो भन्नु स्वतन्त्र पत्रकारिता माथी भैरहेको आक्रमणबाट सुरक्षा दिनुपर्ने प्रहरीबाटै असुरक्षाको व्यवहार भएको नेपाल पत्रकार महासङ्घ सुनसरीका अध्यक्ष सन्तोष काफलेले बताए ।
पक्राउ परेका व्यक्तिलाई केही घण्टामै रिहा गरिएको विषयले प्रहरीको कार्यशैली र सामाजिक सञ्जाल मार्फत हुने साइबर अपराध सम्बन्धी उजुरीमा प्रहरीले गर्ने गैर जिम्मेवार व्यवहार यसबाट उदाङ्ग भएको भएको छ ।
