धरान: बिपी कोइराला स्वास्थ्य विज्ञान प्रतिष्ठानका प्रमुख डा. इन्द्र लिम्बुले स्वास्थ्य मन्त्री एवम् गृहमन्त्रीद्वारा अनुगमनपछि प्रतिष्ठानमा ‘फास्ट ट्र्याक’बाट सेवा सुधार, प्रशासनिक चुस्तता र पूर्वाधार सञ्चालनलाई तीव्रता दिन निर्देशन प्राप्त भएको बताएका छन् ।
आईतबार गृहमन्त्री सुदन गुरुङ र स्वास्थ्य मन्त्री निशा मेहताले प्रतिष्ठानको निरीक्षणपछि तत्काल कार्यान्वयन हुनेगरी निर्देशन दिएको उनले बताएका हुन ।
उनका अनुसार लामो समयदेखि पूर्ण रूपमा सञ्चालनमा आउन नसकेको मातृ तथा शिशु स्वास्थ्य एमसीएच भवनलाई आंशिक रूपमा भएपनि यथाशीघ्र सञ्चालन गर्न, आवश्यक व्यवस्थापनलाई व्यवस्थित ढङ्गले अघि बढाउन निर्देशन दिइएको छ ।
प्रतिष्ठानका गतिविधिलाई थप पारदर्शी बनाउन प्रत्येक महिना सञ्चार माध्यम मार्फत सार्वजनिक कार्यक्रम सञ्चालन गर्ने तयारी भइरहेको छ । मन्त्रालयको निर्देशन अनुसार प्रतिष्ठानले गरेका काम, उपलब्धि र सेवा प्रवाहबारे मासिक रूपमा जानकारी सार्वजनिक गर्ने कार्यक्रम चालु महिनाको अन्त्यदेखि सुरु गर्ने तयारी गरिएको उनले बताए ।
डा. लिम्बुले मन्त्रीद्वयसंग बिपीका व्यवस्थापन पक्षको आन्तरिक छलफलमा छाता ऐनको विषयमा पनि छलफल भएको जानकारी दिए । बिपी कोइराला स्वास्थ्य विज्ञान प्रतिष्ठानको ऐतिहासिक पृष्ठभूमि र विशिष्टतालाई जोगाउँदै अन्य स्वास्थ्य प्रतिष्ठानभन्दा पृथक् पहिचान कायम रहने गरी आवश्यक पहल गरिने आश्वासन प्राप्त भएको उनको भनाइ छ ।
लामो समयदेखि रिक्त रहेको उपकुलपति लगायतका पदाधिकारी नियुक्तिको विषयमा पनि सकारात्मक छलफल भएको उनले बताए । भने ‘केही दिनभित्रै नयाँ पदाधिकारी नियुक्त हुने आश्वासन प्राप्त भएको छ ।’
प्रतिष्ठान जीर्ण अवस्थामा पुगेको भन्ने धारणा सही नभएको दाबी गर्दै डा. लिम्बुले सेवा प्रवाहका हिसाबले प्रतिष्ठान अझै प्रभावकारी रहेको बताए। प्रधानमन्त्री कार्यालयको १०० बुँदे कार्यसूची अन्तर्गत स्वास्थ्य क्षेत्रका सूचकमा प्रतिष्ठान उत्कृष्ट कार्यसम्पादन गर्ने संस्थामध्ये अग्रस्थानमा रहेको फोकल पर्सनको प्रतिवेदनले देखाएको उनको दाबी छ ।
उनले प्रतिष्ठानको सबैभन्दा ठुलो कमजोरी सेवा प्रवाहमा नभई भएका काम र उपलब्धिलाई प्रभावकारी रूपमा सार्वजनिक प्रसारमा कमी भएको बताए । अब नियमित सञ्चार, पारदर्शिता र जनगुनासोलाई सम्बोधन गर्दै प्रतिष्ठानप्रतिको जनविश्वास थप मजबुत बनाउने प्रतिबद्धता उनले व्यक्त गरे ।
