धरान : भानुचौकबाट बसपार्क सरेपछि त्यसको प्रतिकुल प्रभावको रूपमा मुख्य बजारको व्यापार सुकेको गुनासो स्थानीय व्यवसायीहरूले गरेका छन् ।
उपमहानगरपालिकामा प्रमुख अइन्द्रबिक्रम बेघालाई गुनासो सुनाउन पुगेको व्यवासायीहरुलाई प्रमुख बेघाले भने भानु चौक अझ चम्किने योजना कार्यान्वयन हुने बताउँदै व्यवसाय अझ राम्रो हुने वातावरण बन्ने आश्वासन दिएका छन् ।
व्यवसायीहरूले बसपार्क सर्ने बित्तिकै भानुचोक ‘डेथ सिटी’ जस्तै बनेकोले व्यवसायीलाई थप सङ्कटमा नपार्ने गरी आवश्यक व्यवस्थापन गर्न आग्रह गरेका हुन । उनीहरूले व्यापारमा प्रत्यक्ष असर परेकोले पहाडी क्षेत्र जाने बस भानुचोकबाटै छुट्नै व्यवस्था गर्न माग गरेका थिए ।
व्यवसायीहरूले वान–वे ट्राफिक प्रणाली हटाउन भानुचोकमा सवारी साधन सहज रूपमा आवत जावत गर्ने वातावरण बनाउन, बाटोबाटै यात्रु चढाउन ओराल्न पाउने व्यवस्था गर्न माग गरे ।
व्यवसायीका गुनासा र समस्या समाधान गर्न सम्बन्धित वडाका जनप्रतिनिधिबाट सुनवाइ हुनुपर्ने माग गरिएको छ । साथै घर बहाल कर तथा घर भाडा लिने–दिने प्रणालीलाई व्यवस्थित गरेर विद्यमान समस्या उपमहानगरपालिकाले समाधान गर्नुपर्ने माग गरेका छन् ।
व्यवसायीहरूको टोलीलाई कावा नगरप्रमुख बेघाले व्यवसायीहरूलाई नआत्तिन आग्रह गर्दै भानुचोक क्षेत्रको व्यावसायिक गतिविधिलाई थप चलायमान बनाउने गरी योजना अघि बढाइने बताए ।
उनले भने ‘भानुचोकलाई व्यापारिक, सांस्कृतिक तथा पर्यटकीय गतिविधिको केन्द्र बनाउन व्यवसायी, जनप्रतिनिधि र सरोकारवालासँग समन्वय गरी आवश्यक निर्णय लिइने छ ।’
