धरान : सङ्खुवासभा जिल्लाको सिलिचोङ गाउँपालिकाका स्वास्थ्य सेवाको कार्यसम्पादनमा लगातार तेस्रो पटक पहिलो स्थानमा रहेको छ ।
जिल्लाका १० स्थानीय तहमध्ये सिलिचोङ आर्थिक वर्ष २०८२/०८३ को स्वास्थ्य क्षेत्रको कार्यसम्पादन मुल्याङकनमा पहिलो बनेको हो। स्वास्थ्य सम्बन्धी विभिन्न सूचकका आधारमा गरिएको मूल्याङ्कनमा सिलिचोङले ८० दशमलव ७ अङ्क प्राप्त गर्दै उत्कृष्ट स्थानीय तहको स्थान कायम गरेको हो।
स्वास्थ्य कार्यालय सङ्खुवासभाका प्रमुख महेश भट्टका अनुसार मकालु ७९ दशमलव ९ अङ्कले दोस्रो, खाँदबारी नगरपालिका ७९दशमलव ८ अङ्कले तेस्रो स्थानमा रहे ।
खाँदबारीमा आयोजित वार्षिक समीक्षा तथा स्वास्थ्य सूचक विश्लेषण कार्यक्रमका अवसरमा सिलिचोङ गाउँपालिकाका स्वास्थ्य शाखा प्रमुख दीपेन्द्र कुलुङले प्रशंसा पत्र प्राप्त गरे ।
सिलिचोङ गाउँपालिकाले यसअघि पनि लगातार दुई आर्थिक वर्ष स्वास्थ्य कार्यसम्पादनमा पहिलो स्थान हासिल गरिसकेको थियो। यस वर्षको नतिजासँगै गाउँपालिकाले लगातार तेस्रो वर्ष उत्कृष्ट स्थानीय तह बन्ने सफलता प्राप्त गरेको छ ।
