धरान : राष्ट्रिय सहकारी बैंकले धरानका दुईबटा बचत तथा ऋण सहकारीलाई सम्मान गरेको छ ।

बैंकले धरान-१० सैनिक चौकमा रहेको उद्यमशील बचत तथा ऋण सहकारी संस्था लिमिटेड र धरान ९ मा रहेको श्री शिखर बचत तथा ऋण सहकारी संस्था लिमिटेडलाई सम्मान गरेको हो ।

आर्थिक वर्ष २०७५/७६ मा शाखा कार्यलय धरानसंग सदस्य सहकारी संघसंस्थाले गरेको कारोबारको आधारमा नियमित कारोबार बिधामा राष्ट्रिय सहकारी बैंकद्वारा उद्यमशील सहकारी सम्मानित भएको हो ।

सहकारी संघ/संस्थाहरूको प्रवर्द्धन, विकास एवम् बैङ्किङ कारोबारको लागि सहकारी क्षेत्रको एकमात्र बैंक राष्ट्रिय सहकारी बैंकको १६ औँ वार्षिक साधारणसभामा घोषणा गरीएको शाखास्तरीय पुरस्कृत कार्यक्रम अन्तरगत उद्यमशील सहकारीलाई सम्मानपत्र प्रदान गरीएको हो ।

यसैगरी सम्मानित हुनेमा धरान-९ मा रहेको श्री शिखर सहकारीले उत्कृष्ट कारोबार बिधामा सम्मान प्राप्त गरेको हो ।

उक्त सम्मान कार्यक्रममा कार्यक्रमका प्रमुख अतिथि राष्ट्रिय सहकारी बैंकका केन्द्रिय सञ्चालक अमृता सुब्बाद्वारा सम्मानपत्र प्रदान गरीएको थियो ।

राष्ट्रिय सहकारी बैंक धरान शाखा समन्वय उपसमिति संयोजक नरेशकुमार इवारमको अध्यक्षतामा सम्पन्न भएको उक्त कार्यक्रममा धरान शाखा समन्वय उपसमिति सदस्य, सल्लाहकारहरुको साथमा सम्मानित हुने सहकारीका सञ्चालकहरूको उपस्थिति रहेको थियो ।