_1749430366.gif)
धरान : परिवर्तनका लागि सामाजिक अभियानले सामाजिक स्वास्थ्य क्लिनिकको १६ औँ संस्करण सम्पन्न गरेको छ। मुटु, रक्तचाप, मधुमेह सम्बन्धी परीक्षण गरिने उक्त निःशुल्क सामाजिक स्वास्थ्य क्लिनिकमा ७० वर्ष भन्दा माथिका ८५ जनाले स्वास्थ्य परीक्षण गराएका थिए ।
मुटु रोग विशेषज्ञ डा.प्रशान्त साहले परीक्षण गर्ने उक्त कार्यक्रम ताप्लेजुङ सुनसरी सरोकार समाज धरानको सहकार्यमा आयोजना भएको हो। परिवर्तनका लागि सामाजिक अभियानका अध्यक्ष विष्णु बरालले विगत १० महिनादेखि पाक्षिक रूपमा यो कार्यक्रम सञ्चालन हुँदै आएको बताएका छन् । ७० वर्ष भन्दा माथिका बुवाआमाहरुलाई स्वास्थ्य परीक्षण गराउन सजिलो होस् भन्ने हेतुले यो कार्यक्रम १० महिना अघिदेखि सुरु गरेको बरालले जानकारी दिए ।
त्रिभुवन बरालको संयोजकत्वमा आयोजित उक्त कार्यक्रममा अभियानका अभियानकर्मी मोहन श्रेष्ठ, वर्षा अग्रवाल, जेनिश शाक्य, विजय श्रेष्ठ, हेम ढकाल, निशान नेपालको सहभागिता रहेको थियो । वी. पी. कोइराला स्वास्थ्य विज्ञान प्रतिष्ठानका स्टाफ नर्स रमला गुरागाईँले रक्तचाप परीक्षण गरेकी थिइन ।
नवौँ संस्करण सम्म धरान मोडल कलेजमा आयोजित यो क्लिनिक वडा–वडामा आयोजना गर्ने अभियान अनुरूप धरानको १८, २, १, १३, ३ र १२ नं. वडामा आयोजना गरिसकिएको छ भने धरान – ८ मा ताप्लेजुङ सुनसरी सरोकार समाजसँग सहकार्य गरी आयोजना गरिएको हो।
समाजका अध्यक्ष मेजर दल बहादुर राईले परिवर्तनका लागि सामाजिक अभियानसँग सहकार्य गर्ने अवसर पाएकोमा खुसी व्यक्त गरे । स्वास्थ्य परीक्षण पश्चात् आयोजना गरिएको औपचारिक कार्यक्रममा समाजका संरक्षक मनोज मेन्याङ्गवो, महासचिव वासुदेव गौतम, देवराज अधिकारी लगायतले धन्यवाद व्यक्त गरेका थिए भने निशान नेपालले कार्यक्रम सञ्चालन गरेका थिए ।
